Пүрэв гарагт биткойны ханш дахин өсөж, 111,000 ам.доллароос давж шинэ дээд түвшинд хүрлээ. Нээлтийн арилжаагаар ханш нь 111,886 ам.долларт хүрч, улмаар 111,012 орчим ам.долларт тогтворжсон байна.

Хөрөнгө оруулагчдын идэвх нэмэгдэж, АНУ-ын крипто зохицуулалттай холбоотойгоор зах зээлд эерэг хүлээлт үүсэж, мөн томоохон институционал хөрөнгө оруулагчдын сонирхол нэмэгдсэнтэй холбоотойгоор биткойны ханш өсөлт үзүүлж буй талаар шинжээчид мэдээллээ. 

Ерөнхийдөө биткойны ханш ихэнхдээ технологийн компаниудын хувьцааны ханштай ижил чиглэлд хөдөлдөг. Гэвч АНУ-ын хөрөнгийн зах зээл уналттай байгаа хэдий ч биткойн  эсрэг хөдөлгөөн үзүүлсэн нь хөрөнгө оруулагчид илүү тогтвортой, үнэ цэнээ хадгалах хөрөнгө хайж эхэлсний илрэл байж болзошгүй хэмээв.

Мөн “Moody’s” агентлаг АНУ-ын зээлжих зэрэглэлийн үнэлгээг бууруулсан нь ам.долларын ханшийн тогтвортой байдалд эргэлзээ төрүүлж, биткойныг үндэсний мөнгөн тэмдэгтийн эрсдэлийг давах баталгаатай хөрөнгө гэж үзэх хандлагыг нэмэгдүүлсэн гэж шинжээчид онцолжээ.