- Жони Айв “io” стартапаараа дамжуулан “OpenAI” компанитай 6.4 тэрбум ам.долларын түншлэл байгуулж, хиймэл оюунд суурилсан шинэ төрлийн төхөөрөмжүүдийг бүтээхээр ажиллаж эхэлсэн байна.
- Шинжээчид тэдний хамтран бүтээх хиймэл оюунд суурилсан туслахууд нь уламжлалт ухаалаг утас, зөөврийн компьютерийг орлох шинэ төрлийн ухаалаг төхөөрөмжүүд болох боломжтой гэж үзэж байна.
- “Apple” компани энэ шинэ технологийн давалгаанд хоцорч яваа байж болзошгүй.

iPhone болон Apple Watch-ийн дизайныг гаргаж, “Apple”-ийн дүр төрхийг тодорхойлж байсан алдарт дизайнер Жони Айв технологийн ертөнцөд дахин эргэн ирлээ. Гэхдээ энэ удаа тэрбээр “Apple”-тай бус, өөрийн үүсгэн байгуулсан “io” стартапаараа дамжуулан “OpenAI” компанитай 6.4 тэрбум ам.долларын түншлэл байгуулж, хиймэл оюунд суурилсан шинэ төрлийн төхөөрөмжүүдийг бүтээхээр ажиллаж эхэлсэн байна.
Энэхүү хамтын ажиллагаа Цахиурын хөндийд томоохон шуугиан дэгдээж, технологийн шинэ эрин үеийн эхлэлийг тавих магадлалтай талаар яриа өрнөж эхэлжээ. Шинжээчид “OpenAI” болон Жони Айвын хамтран бүтээх хиймэл оюунд суурилсан туслахууд нь уламжлалт ухаалаг утас, зөөврийн компьютерийг орлох шинэ төрлийн ухаалаг төхөөрөмжүүд болох боломжтой гэж үзэж байна. “Apple”-ийн үйлчилгээ хариуцсан дэд ерөнхийлөгч Эдди Кью “Итгэмээргүй сонсогдож болох ч, хиймэл оюунд суурилсан төхөөрөмжүүд iPhone-ыг 10 жилийн дотор орлох боломжтой” хэмээн онцолжээ.
Гэвч “Apple” энэ шинэ технологийн давалгаанд хоцорч яваа байж болзошгүй. Дуу хоолойгоор ажилладаг туслах “Siri” нь одоо ч зөвхөн энгийн асуулт, хариултын хэлбэрээр ажилласаар байгаа бол “ChatGPT” болон “Google Gemini” зэрэг хиймэл оюунд суурилсан системүүд илүү энгийн яриа өрнүүлэх чадвартай болсон. Үүн дээр нэмээд “Apple” хиймэл оюуны шинэчлэлүүдээ оны эхээр хойшлуулаад буй.
Нөгөөтэйгүүр, “OpenAI” нь “Apple”-аас гарсан шилдэг дизайнеруудыг өөртөө нэгтгэж байна. Жони Айвын багт “Apple”-д өмнө нь ажиллаж байсан Скотт Кэннон, Тан Тан, Эванс Ханки зэрэг туршлагатай мэргэжилтэн багтжээ.
Хэд хэдэн стартап өмнө нь хиймэл оюунд суурилсан төхөөрөмж бүтээхийг оролдсон ч амжилт олоогүй. Тухайлбал, “Apple”-ийн хуучин ажилтнуудын үүсгэн байгуулсан “Humane” компани жижиг хэмжээтэй, проектортой ухаалаг төхөөрөмж бүтээсэн ч борлуулалт муугаас шалтгаалан HP-д зарсан. Харин “Rabbit” компанийн 199 ам.долларын үнэтэй төхөөрөмж муу үнэлгээ авчээ. Жони Айв эдгээр бүтээгдэхүүнийг “муу бүтээгдэхүүн” хэмээн дүгнэсэн байна.
“OpenAI”-аар зогсохгүй “Apple”-ийн олон өрсөлдөгч хиймэл оюуны салбарт дорвитой ахиц гаргаж буй. “Meta” болон “Ray-Ban” хамтран хиймэл оюунт ухаалаг нүдний шил бүтээж, хоёр сая гаруй борлуулсан бөгөөд хэрэглэгчтэй яриа өрнүүлж, видео бичих боломжтой аж. Харин “Google” хиймэл оюуны шинэ загвар, функц, ухаалаг шил танилцуулж, “Gemini”-г улам боловсронгуй болгож байна.
“OpenAI” одоогоор ямар төрлийн төхөөрөмж бүтээж байгаагаа дэлгэрэнгүй мэдээлээгүй ч ирэх онд танилцуулахаа мэдэгджээ. Харин Жони Айв хэмээх алдарт дизайнер хиймэл оюуны хөгжлөөр тэргүүлж буй компанитай нэгдэж, ирээдүйн технологийг бүтээхээр ажиллаж эхэлсэн нь “Apple”-д томоохон анхааруулах дохио болж байна.