Монгол Улс, АНУ хоорондын агаарын тээврийн шинэ эрин эхлэхэд ердөө хоёр хоног үлдээд байна. Америкийн "Юнайтэд Эйрлайнс" компани энэ тавдугаар сарын 1-нээс Монгол улсаас Японоор дамжин АНУ руу тогтмол нислэг үйлдэхээр болжээ. Энэхүү шинэ нислэгийг эхлүүлэхтэй холбогдуулан Иргэний нисэхийн үндэсний төв болон "Юнайтэд Эйрлайнс" компани хооронд зорчигчийн аюулгүй байдлын үйлчилгээ үзүүлэх гэрээ байгуулсан байна. Гэрээний хүрээнд олон улсын эрх зүйн стандартад нийцсэн аюулгүй ажиллагаа, нэмэлт үйлчилгээний зохицуулалтыг багтааснаараа онцлогтой гэж албаныхан мэдээлэв.

"Юнайтэд Эйрлайнс" компани 2025 онд дэлхий даяар найман шинэ чиглэлд нислэг нээхээр төлөвлөсөн бөгөөд үүнд Монгол Улс багтсан нь онцлох үйл явдал болж буй. Улаанбаатар хотоос АНУ руу долоо хоногт гурван удаа тогтмол нислэг үйлдэх хуваарьтайгаар эхлэх уг нислэг нь хоёр орны аялал жуулчлал, эдийн засгийн хамтын ажиллагаанд чухал нөлөө үзүүлэхээр байна. Улаанбаатар хотын захиргаанаас ч энэ оны жуулчны улиралд бэлэн байх шат дараатай арга хэмжээний бэлтгэлийг хангаад буй юм. Энэ хүрээнд Чингис хаан олон улсын нисэх онгоцны буудал руу бүрэн тоноглолтой 10 шаттл автобусыг үйлчилгээнд гаргаад буй аж.

Монголын зуны нислэгийн шинэчилсэн хуваарийн дагуу зөвхөн АНУ-ын чиглэл нэмэгдэхгүй бөгөөд БНХАУ, Вьетнам зэрэг улсаас ч нислэгийн урсгал өсөх төлөвтэй байна. БНХАУ-ын “Spring Air”, “Hainan Airlines”, “China United Airlines”, “Juniyao Airlines”, Вьетнамын “VietJet” компани Улаанбаатар хотод шинэ чиглэлүүдээр нислэг үйлдэхээр болжээ. Түүнчлэн Монголын үндэсний агаарын тээвэрлэгч МИАТ компани Бээжингийн Дашин нисэх онгоцны буудал руу шинэ нислэг нээхээр бэлтгэж байна.

Дотоодын чиглэлд МИАТ компани энэ зун Ховд, Хөвсгөл, Увс, Завхан, Говь-Алтай зэрэг аймаг руу нийт 764 удаагийн нислэг үйлдэхээр төлөвлөсөн. Мөн ОХУ, БНХАУ, БНСУ, Вьетнам зэрэг таван улсын 17 агаарын тээврийн компани Улаанбаатартай 22 чиглэлд нийт 10,116 удаа нислэг үйлдэх хуваарь батлаад байна. Энэ нь Монгол Улсын агаарын тээврийн сүлжээг тэлэх, олон улсын холболтыг өргөжүүлэх томоохон ахиц болохыг салбарынхан онцолж байна.

Тавдугаар сарын 1-ний өдөр хөөрөх анхны нислэг нь Монгол Улс, АНУ-ын хоорондын эдийн засаг, бизнес, аялал жуулчлал, соёлын солилцоог шинэ түвшинд хүргэх эхлэл болно гэж хоёр талын албаныхан үзэж байна.