Оросын арми Украины зүүн хэсэгт орших Вугледар хотыг эзлэн авлаа. Хүн ам нь 14,000-аас зуу гаруй болж цөөрсөн Вугледар хотын дээгүүр Оросын цэргүүд тугаа мандуулан алхаж байгааг эх сурвалж мэдээлсэн бөгөөд Украин тус хотоос цэргээ татсанаа лхагва гарагт батлаад буй. 

ОХУ-ын Ерөнхийлөгч Владимир Путин Донбассын зүүн бүсийг бүхэлд нь эзлэхийг зорьж буй. Нүүрсний уурхайн эргэн тойронд баригдсан Вугледар хот нь Покровск хотоос өмнө зүгт 50 км зайд оршдог бөгөөд сүүлийн хэдэн сарын турш Оросын армийн дайралтын гол цэг болоод байна. 

Украины Ерөнхийлөгч Володимир Зеленский АНУ-д айлчилж, Оросын түрэмгийлэгчдийг няцаах зорилготой 8 тэрбум гаруй ам.долларын буцалтгүй тусламж үзүүлэх амлалтыг Байденаас авсан юм. Уг тусламжийн хүрээнд 130 км хүртэлх тусгалтай Joint Standoff Weapon хэмээгдэх байг өндөр нарийвчлалтайгаар онох чадамжтай бөмбөгний анхны тээвэрлэлт багтсан байна.