АНУ-ын Ерөнхийлөгч Д.Трамп гадны орнуудаас импортолж буй бүх бараанд татвар ногдуулах тухай шийдвэрээ танилцууллаа. Хамгийн өндөр хувьтай татварыг Вьетнам, Камбож, Лаос зэрэг улсад ногдуулж, Вьетнам улс 46 хувийн татвартай нүүр тулав. Д.Трампын мэдэгдлийн дараа Вьетнамд бүтээгдэхүүн, бараагаа үйлдвэрлэдэг Nike болон Apple компанийн хувьцааны ханш тус бүр долоо орчим хувиар унав.

Өчигдөр Цагаан ордонд хийсэн хэвлэлийн хурлын үеэр тэрбээр хоёр хүснэгтийг танилцуулжээ. Эхний хүснэгтэд гадаадын улс орнуудаас Америкийн бараанд ногдуулж буй татварын хувь хэмжээг, хоёр дахь хүснэгтэд уг татварын хариуд АНУ-ын зүгээс ногдуулж буй татварын хувь хэмжээг харуулсан байна. Уг хүснэгтийг Х платформ дахь Цагаан ордны хуудсанд нийтэлжээ. Тухайлбал, Америкийн тал БНХАУ-ын бараанд 34 хувь, Европын Холбооны бараанд 20 хувь, Швейцарын бараанд 31 хувь, Израилын бараанд 17 хувь, Казахстаны бараанд 27 хувийн татвар ногдуулжээ. Хамгийн өндөр хувьтай татварыг Вьетнам, Камбож, Лаос зэрэг улсад ногдууллаа. Вьетнам улсын бараанд 46 хувийн татвар ногдуулав. ОХУ уг хүснэгтэд бичигдээгүй байна.

Ерөнхийлөгч Д.Трамп өөрийн гаргасан шийдвэрийг “дэлхийн бүх улс оронд харилцан татвар ногдуулахыг зохицуулсан түүхэн зарлиг” гэж нэрлээд “өнөөдөр бол Америкийн түүхэн дэх хамгийн чухал өдрүүдийн нэг мөн” гэж тодорхойллоо.

АНУ-д импортлох бүх төрлийн авто машинд 25 хувийн татвар ногдууллаа. Уг татвар дөрөвдүгээр сарын 3-ны өдрөөс, харин авто машины сэлбэг хэрэгслийн импортод ногдуулсан татвар тавдугаар сарын 3-наас тус тус үйлчилж эхлэнэ.