Монгол Улсын Засгийн газраас хөрөнгө оруулалтын эрх зүйн тогтвортой, таатай орчныг бүрдүүлэх, урт хугацааны түншлэл бий болгоход чиглэсэн бодлого баримталж байгааг Ерөнхий сайд Г.Занданшатар Монголын эдийн засгийн форумын үеэр онцоллоо.

“Монголын эдийн засгийн форум 2025” энэ сарын 8, 9-ний өдрүүдэд Төрийн ордонд "Маргаашийн төлөө хамтдаа" уриан дор зохион байгуулагдаж байгаа бөгөөд 3000 гаруй хөрөнгө оруулагч, бизнес эрхлэгч, бодлого тодорхойлогчид, олон улсын байгууллагын төлөөллийг нэг дор цуглуулж буйгаараа онцлог юм.

Форумын эхний хэлэлцүүлэг “Хөрөнгө оруулагчийн итгэлийг даах нь” сэдвээр өрнөсөн ба энэхүү хэлэлцүүлэгт АНУ-ын CNN телевизийн сэтгүүлч Маик Валерио панелистаар оролцох үеэрээ, Монгол Улс хүний нөөц, байгалийн баялаг, онцлог геополитикийн байршил дээр төвлөрсөн бодлогоор хөрөнгө оруулалтыг татаж чадвал дараагийн шатны хөгжилд хүрэх боломжтойг онцлов. Тэрбээр Ерөнхий сайдын байр суурийг нэгтгэн “Make Mongolia Great Again” буюу “Монгол Улсыг дахин агуу болгох” боломж гэж тодорхойлов.

Форумын дараагийн хэсэг “Тодорхойгүй байдалтай нүүр тулах нь” сэдвээр үргэлжилж, Монгол болон ижил түвшний хөгжиж буй орнуудад олон улсын геополитик, худалдааны зөрчилдөөн хэрхэн нөлөөлж байгааг хэлэлцэв.

Энэхүү хэлэлцүүлэгт УИХ-ын гишүүн, Эдийн засгийн байнгын хорооны дарга Р.Сэддорж, УИХ-ын гишүүн, Сангийн сайд Б.Жавхлан, Монголбанкны ерөнхийлөгч Б.Лхагвасүрэн, АНУ-ын Элчин сайд Ричард Л. Буанган, Европын холбооны Элчин сайд Ина Марчюлёните, Азийн хөгжлийн банкны Ерөнхий эдийн засагч Альберт Ф. Парк нар оролцлоо.

Хэлэлцүүлгийн үеэр дэлхийн зах зээлийн тогтворгүй байдал, түүхий эдийн экспортод хэт түшиглэсэн Монголын эдийн засаг хэрхэн эмзэг байгааг онцолсон бөгөөд инфляцын дарамтыг хязгаарлахын тулд төсвийн болон мөнгөний бодлогын уялдаа чухал болохыг талууд санал нэгтэй хүлээн зөвшөөрөв.

Хэлэлцүүлгийн төгсгөлд форумд оролцогчдос Монгол Улсыг тогтвортой хөгжилд хүргэх нэг зөвлөмж өгөхийг хүссэн юм. АХБ-ны эдийн засагч Альберт Парк болон ЕХ-ны Элчин сайд Ина Марчюлёните нар тогтвортой хөгжлийн бодлогод цаг уурын өөрчлөлт, эрчим хүчний салбар, агаарын бохирдлыг бууруулах чиглэлд анхаарах хэрэгтэйг онцоллоо. АНУ-аас Монгол Улсад суугаа Элчин сайд Ричард Л. Буанган хөрөнгө оруулагчдын итгэлийг бэхжүүлэхэд татварын орчны бодлого чухал болохыг тэмдэглэсэн юм.