“Google” компанийн нүүрстөрөгчийн ялгаруулалт 2019 онтой харьцуулахад 50 хувиар өссөн талаар тус компани мягмар гарагт гаргасан 2024 оны байгаль орчны тайландаа дурджээ. “Google” 2030 он гэхэд нүүрстөрөгчийн ялгарлыг тэглэх зорилготой ч зорилгодоо хүрэх зам хүндрэлтэй байгааг энэхүү үзүүлэлт харуулж байна.

Энэхүү өсөлтийг тус компанийн зүгээс хиймэл оюун ухаан, дата төвүүд, үйлдвэржилт зэргээс үүдэн эрчим хүчний хэрэгцээ огцом нэмэгдэж байгаатай холбон тайлбарлаж байгаа юм. Түүнчлэн “Google”-ийн дата төвийн нийт эрчим хүчний хэрэглээ 2023 онд 17 хувиар өссөн бөгөөд 2023 онд нүүрстөрөгчийн ялгаруулалт өмнөх жилээс 13 хувиар өссөн байна.

Цахилгаан эрчим хүчний эрэлт 2030 он гэхэд 20 хувиар өсөх төлөвтэй байгаа бөгөөд хиймэл оюун ухааны дата төвүүд дангаараа АНУ-ын эрчим хүчний хэрэгцээг 323 ТВт цагаар нэмэгдүүлэх төлөвтэй байгаа юм. 

Сэргээгдэх эрчим хүч нь хиймэл оюун ухааны эрчим хүчний хэрэгцээг хангахад чухал үүрэг гүйцэтгэх боловч нэн даруй хэрэгжүүлэхэд бэрхшээлтэй хэмээн шинжээчид үзэж байгаа аж.

“Google”-ийн дата төвүүд нь ердийн дата төвөөс 1.8 дахин эрчим хүч хэмнэдэг талаар тус тайланд дурджээ. Мөн дата төвүүдийн загвар болон дэд бүтцийг оновчтой болгох, хиймэл оюун ухааны байгаль орчинд үзүүлэх нөлөөллийг нүүрстөрөгчийн ялгарлыг бууруулах замаар ажиллах үүргээ тус компани ухамсарлаж байгаагаа мэдээлжээ.