Залуучууд эцэг эхээсээ санхүүгийн дэмжлэг авах нь улам нэмэгдэж байна. 18-аас дээш насны хүүхэдтэй эцэг эхийн 50 хувь нь тэдэнд санхүүгийн дэмжлэг үзүүлдэг болохыг Savings.com-ийн шинэ судалгаа тогтоожээ. Уг үзүүлэлт 2023 онд 45 хувь, өнгөрсөн жил 47 хувь байсан бол энэ жил 50 хувь болж нэмэгдсэн байна. 

Хоол хүнс авах, гар утасны төлбөр төлөх, эрүүл мэнд болон даатгал зэрэгт бүхий л зардалд эцэг эхчүүд сард дунджаар 1,474 ам.долларыг хүүхдүүддээ зарцуулж байна. Энэ нь сүүлийн гурван жилийн хамгийн өндөр үзүүлэлт болсон гэж тайланд онцолжээ. 

"Насанд хүрсэн хүний амьжиргааны дундаж зардал өссөн" гэж тайланд дурдсан байна. 

Мэргэжилтнүүдийн үзэж байгаагаар өнөө үед залуучуудад өөрсдийгөө санхүүгийн хувьд бие даан авч явахад өмнөх үеийнхээс хамаагүй хүнд болжээ. 

Өдөр тутмын амьжиргааны өртөг, орон сууцны үнэ огцом өсөж байгаагаас гадна миллениал болон Z үеийнхэн өмнөх үетэй харьцуулахад санхүүгийн бэрхшээлтэй тулгарах нь нэмэгдсэн байна.

Насанд хүрсэн хүүхдүүдээ санхүүгийн хувьд дэмжих нь эцэг эхийн өөрсдийн санхүүгийн ирээдүйд сөргөөр нөлөөлж болзошгүй юм. Savings.com-ийн судалгаагаар эцэг эхчүүдийн 60 гаруй хувь нь хүүхдүүдээ дэмжихийн тулд өөрсдийн санхүүгийн тогтвортой байдлаа золиосолсон гэж хариулсан байна.