Өвлийн эхэн сар дундаа орчихоод байхад цаг агаар харьцангуй дулаан байгаа нь махны борлуулалт сул байхад нөлөөлж байна. Төхөөрсөн малын мах сайн хөлдөхгүй байгаа тул махны нийлүүлэлт бага байгаа тухай хотын гол, гол худалдааны төвийн наймаачид ярьж байна. Хотынхон идшиндээ ихэвчлэн бага үхрийн мах худалдан авдаг. Сүүлийн жилүүдэд хотынхон мах бөөндөж авахдаа шинжилгээний бичгийг нь үзэх хүсэлт тавих болсон нь сайн хандлагын өөрчлөлт гэж байлаа. Мөн махны борлуулалтад аль аймгаас бэлтгэсэн мах вэ? гэдэг үнэд нөлөөлж байна. 

Төвийн бүсээс төхөөрсөн шүдлэн, хязаалан үхрийн нэг кг махыг 11 мянган төгрөгөөр борлуулж буй. Ингэхээр нэг үхэр ойролцоогоор 150-200 кг жин татна гэвэл 1.6-2.2 сая төгрөгийн үнэтэй хүнсний зах дээр зарагдаж байна. 

Дорнод, Сүхбаатар  аймгаас бэлтгэсэн малын махыг хүмүүс их худалдан авдаг аж. Тарга хүч сайтай шүдлэн, хязаалан үхрийн махны кг-ийн үнэ 12 мянган төгрөг буюу төвийн бүсийнхээс  кг-ынх нь үнэ 1000 төгрөгөөр илүү зарагдаж байгаа аж.

Баруун аймгаас бэлтгэсэн  идэшний үхэр үнийн хувьд 1.1-1.8 сая төгрөгийн хооронд хэлбэлзэж байна. Махны нийлүүлэлт цас орж, улам хүйтрэхээр нэмэгдэнэ гэсэн хүлээлт өндөр байна.

Малчид өөрсдөө махаа бэлтгэж хотод борлуулах сонирхол жилээс жилд нэмэгдэж байгаа. Энэ нь ченжүүдэд хямд өгөхгүй мөн өвөлжөөндөө буух цагаар хөдөөний ажил нь бага зэрэг татарч амсхийдэг тул ашгаа бодож хотод махаа борлуулдаг аж. 

Харин ҮСХ-ны мэдээгээр Улаанбаатар хотын зах худалдааны төвүүдэд махны жижиглэнгийн дундаж үнэ,

Хонины ястай мах-14 мянган төгрөг

Хонины цул мах-14.9 мянган төгрөг

Үхрийн ястай мах-17.7 мянган төгрөг

Үхрийн цул мах-20.4 мянган төгрөг

Адууны ястай мах-11.9 мянган төгрөг

Ямааны ястай мах-10.6 төгрөгийн үнэтэй байгаа юм. Иймд хүмүүс бөөнд нь худалдаж авах нь хямд тусаж, идэшний малын махны нийлүүлэлт нэмэгдэхийг хүлээж байна.