Бизнесийг тэгээс нь эхлэн босгож амжилтад хүргэх амаргүй ч боломжгүй зүйл биш. Гагцхүү өөртөө итгэх нь амжилтын үндэс гэдгийг амжилттай яваа олон бизнес эрхлэгч дуу нэгтэйгээр хэлдэг. Энэ итгэлээрээ тэд аливаа саад бэрхшээлийг давж, мөрөөдлөө бодит болгодог аж. Тэгвэл амжилтад хүрэхэд нөлөөлөх ямар зөвлөгөөг тэд өгч байна вэ? 

Зөвлөгөө №1: Хэн ч хийж чадна 

2017 онд “Crumbl Cookies”-ийг үүсгэн байгуулахаасаа өмнө Жэйсон МакГоуэн нарийн боов хийх талаар ямар ч мэдлэггүй байжээ. Гэсэн хэдий ч энэ нь түүнд жигнэмгийн эзэнт гүрэн байгуулах хүслээсээ ухрах шалтгаан болоогүй аж. Өдгөө “Crumbl” дэлхий даяар 1000 орчим салбартай тэрбум ам.долларын хөрөнгөтэй компани болжээ. Макгоуэн шийдэмгий байвал хэн ч үүнтэй ижил амжилтад хүрч чадна гэдэгт итгэдэг. 

“Solidcore”-ийн үүсгэн байгуулагч Энн Мэлум ч мөн ижил үзэл бодолтой явдаг нэгэн. Түүний 2013 онд эхлүүлсэн фитнессийн төсөл нь өдгөө 100 гаруй салбартай сүлжээ болтлоо өргөжжээ. 2023 онд хувьцаагаа зарж, 88.4 сая ам.доллар олсон тэрбээр “Зорилгынхоо төлөө тууштай зүтгэснээр хүн юунд ч хүрч чадна” хэмээн зөвлөсөн юм.

Зөвлөгөө №2: Бусдаас онцгой болгодог зүйлээ торд

Хүн өөрийнхөө бусдаас өвөрмөц болгодог онцлогоо хүлээн зөвшөөрч, түүнийгээ өөрт ашигтайгаар эргүүлэхийн чухлыг Мэлум мөн онцолсон юм. Өвөрмөц авьяас чадвар, шинж чанараа ашиглах нь амжилтын үндэс гэдэгт тэрбээр итгэдэг аж. Хүн бүр өөрийн гэсэн давуу болон сул талтай байдаг бөгөөд гагцхүү түүнийгээ өөрт ашигтайгаар эргүүлэх нь чухал хэмээв.

“Kopi Kenangan” компанийн үүсгэн байгуулагч Эдвард Тиртаната ч мөн бизнес эрхлэгчдэд бусдаас өөр байхыг зөвлөжээ. Орон нутгийн жижиг лангуунаас гараагаа эхэлсэн түүний кофены сүлжээ өдгөө 800 гаруй салбартай олон улсын брэнд болон өргөжсөн. Тэрбээр ирээдүйд томоохон компаниудын чиг хандлага одоогийнхоос тэс ондоо байна хэмээн үздэг аж. 

Зөвлөгөө №3: Хүсэл сонирхолтой бай, тууштай зүтгэ

Шон Цао хачиртай талханд дуртай нэгэн. Энэ нь түүнд хоол хүргэлтийн “Caviar” компаниа үүсгэн байгуулах сэдлийг өгчээ. “Бизнес эрхлэхдээ өнгөц зүйлд авталгүй харин хийж буй бүтээгдэхүүндээ чин сэтгэлээсээ ханддаг байх хэрэгтэй. Хүсэл тэмүүлэл, тууштай зан бизнес эрхлэгчдэд сорилт бэрхшээлийг давах хүчийг өгдөг” хэмээн Цао хэлж байв. Дур сонирхлоо ажил болгосон тэрбээр компаниа 100 сая ам.доллароор амжилттай худалджээ. Дээр дурдагдсан бүх энтрепренер дуртай зүйлээ саад тотгорыг үл ажран хийж амжилттай бизнес болгосныг онцлоё. 

Зөвлөгөө №4: Зүгээр л эхэл

Ингээд эцэст нь амжилттай энтрепренерүүдийн дуу нэгтэйгээр өгдөг зөвлөгөө бол зүгээр л эхлэх. Энн Мэлум хуримтлалаараа анхны пилатиз дасгалын төвөө нээж, Жэйсон Макгоуан мэдэхгүй, чадахгүй гэдгээрээ өөрийгөө хязгаарлалгүй жигнэмгийн жор туршсаар компаниа босгожээ. Бизнес эхлүүлэхэд хамгийн чухал нь анхны алхмаа хийх гэдгийг тэд онцолсон юм.

Өөртөө итгэж, эрсдэлд үүрч, олж харсан боломжоо алдалгүй атгасан нь тэднийг амжилтад хүргэж, сая долларын эзэд болгожээ. Тэд бүгд анхны алхмаа зоригтойгоор хийж, сорилт бэрхшээлийг даван туулсаар өөрсдийн өвөрмөц санаа, дур сонирхлоо амжилттай бизнес болгон хөгжүүлсэн юм.