АНУ-ын Холбооны нөөцийн сан  өмнө таамаглаж байсны дагуу  хуралдаж, бодлогын хүүгээ 0.25 пунктээр бууруулж 4.5-4.75 хувь болгосон байна. Холбооны нээлттэй зах зээлийн хороо (FOMC) хоёр өдрийн турш хуралдсаны эцэст энэхүү шийдвэрийг гаргажээ. Ийнхүү ХНС АНУ-ын ерөнхийлөгчийн сонгууль өнгөрсний дараа бодлогын хүүгээ буурууллаа.

Өмнө нь тус банк есдүгээр сард хүүг 5.25-5.5 хувь байсныг 0.5 хувиар бууруулж 4.75-5.0 болгож байсан. Тэр нь сүүлийн дөрвөн жилд АНУ анхны удаа бодлогын хүүгээ бууруулсан тохиолдол болж, олон улсад энэ мэдээллийг ихэд цочмог хүлээж авсан. “FOMC” мэдэгдэл хийхдээ “Эдийн засгийн үйл ажиллагаа тогтвортой хурдтай өргөжиж байна” гэжээ. Харин ХНС-гийн дарга Жером Пауэлл хэлэхдээ мягмар гарагт болсон сонгуульд Доналд Трамп ялалт байгуулсан нь ойрын хугацааны бодлогод нөлөөлөхгүй хэмээжээ.  Мөн тэрбээр нэмж хэлэхдээ эдийн засагт эрсдэл учруулж магадгүй хүчин зүйлс буурсан гэж нэмж мэдэгдэв.

ХНС бодлогын хүүгээ бууруулсны дараа S&P 500 индекс 0.81 хувиар өсөж, АНУ-ын засгийн газрын 10 жилийн хугацаатай бондын өгөөж бага зэрэг буурч 4.3 хувь, хоёр жилийн бондын өгөөж нэмэгдэн 4.2 хувь болсон байна. Мөн ам.долларын индекс 0.69 хувиар буурч, евро 0.62 хувиар өсчээ.