Цахим гэмт хэрэгтнүүд хохирогчийн сэтгэл хөдлөлд тулгуурлан залилах хэрэг нэмэгдэж байна.

“Хайр дурлалын луйвар гэж нэрлэгдэх гэмт хэрэг нь залилагч хохирогчтой харилцаа үүсгэж, итгэлцлийг бий болгож, улмаар хохирогчийн санхүүгийн мэдээллийг олж авах эсвэл мөнгө шилжүүлэх явдал юм” хэмээн Санхүүгийн судалгааны “Javelin Strategy & Research” компанийн залилан, аюулгүй байдлын албаны захирал Трейси Киттен дурдлаа.

АНУ-ын Холбооны Худалдааны Комиссоос мэдээлснээр 2023 онд хайр дурлалын луйврын хохирогчид нийт 1.14 тэрбум ам.доллар алдсан байна. Нэг хүнд ногдох дундаж хохирлын хэмжээ 2000 ам.доллар болсон нь залилан хэргийн хамгийн өндөр алдагдал болж буй талаар тус комиссоос мэдэгдлээ.

"Ийм төрлийн луйврын цаана байгаа хүмүүс хүний зан төлөвийн талаар гаргууд мэдлэгтэй байдаг" хэмээн Цагаан ордны мэдээллийн албаны дарга асан, одоо кибер аюулгүй байдлын “Fortalice Solutions” компанийн гүйцэтгэх захирал Тереза Пэйтон онцоллоо.

“Javelin Strategy & Research” компанийн 2023 оны долдугаар сард явуулсан судалгаанд нийт 1500 санхүүгийн зөвлөх оролцсон бөгөөд оролцогчдын 22 хувь нь залилангийн гэмт хэргийн хохирогч болсон үйлчлүүлэгчидтэй байсан хэмээн хариулсан байна.

“Ихэнхдээ цахим гэмт хэрэгтнүүд олон нийтийн сүлжээгээр дамжуулан холбоо тогтоож, хохирогчдоо судалж, харилцаагаа хөгжүүлдэг” хэмээн Киттен хэлэв. Хайр дурлалын луйврын хохирогчдын 73 хувь нь эрэгтэйчүүд байжээ.

Та хайр дурлалын луйврын хохирогч болж буй шинж тэмдгүүд:

Гэнэтийн зурвасууд: Гэмт хэрэгтнүүд гар утасны дугаар, имэйл хаяг, олон нийтийн мэдээллийн хэрэгслээр дамжуулан олон зуун хүнтэй зэрэг холбогдох боломжтой ботуудыг ашигладаг. Энэ нь ихэвчлэн “Сайн уу” гэх энгийн зурвасаас эхэлдэг.

Хэтэрхий сайхан харилцаа: Тэр хүн тантай хэт сайхан харьцаж, ижил сонирхолтой гэдгээ мэдэгдэж, харилцаагаа илүү олон сувгаар үргэлжлүүлэхийг хүсвэл энэ нь мөн нэгэн шинж тэмдэг байж болох юм.

Биечлэн уулзахаас татгалзах: Луйварчин бодит амьдрал дээр уулзахгүй байх олон шалтаг гаргаж ирдэг. Эсвэл тантай уулзахын тулд аяллын зардал хүсэж, нэхэх аюул байдаг хэмээн Пэйтон хэлэв.

Тусгаарлах оролдлого: Гэмт хэрэгтэн таныг өөрсдийн харилцаагаа бусдад хэлэхгүй байх, гэр бүлийнхнээсээ нуухыг уриалах

Дарамт: Харилцаагаа үргэлжлүүлэхийн тулд танаас мөнгө хүсэх

Шинээр харилцаж эхэлж буй харилцагчийг шалгахын тулд та дараах таван зүйлийг хийх боломжтой:

• Харилцагчийн олон нийтийн сүлжээнд байршуулсан зургийг урвуулан хайх. Учир нь гэмт хэрэгтнүүд өөр хүний зураг ашиглан мэдээлэл үүсгэдэг тул та зургийг урвуулан хайж, зургийн бодит эзнийг олох боломжтой юм.
• Олон нийтийн мэдээллийн хэрэгслээр хуваалцаж буй мэдээллээ анхаарах.
• Харилцаж буй хүнийхээ ярианд анхаарал хандуул.
• Санхүүгийн гүйлгээ хийхээс зайлсхийх.
• Олон нийтийн газар уулзах.