Монголбанк төрөөс мөнгөний бодлогын талаар 2025 онд баримтлах үндсэн чиглэлийн төслийг УИХ-д өргөн мэдүүлэхээс өмнө эдийн засагч, судлаач, холбогдох яамдын удирдлага, олон улсын байгууллагын төлөөлөл  мөн хэвлэлийнхнийг оролцуулан хэлэлцүүллээ.

2025 онд Монголбанк дунд хугацааны инфляцыг 5 хувь орчимд барихаар зорьж байна. Гэхдээ нөхцөл байдлаас шалтгаалан +/-2 нэгж хувийн интервалтай, 6 хувь орчимд тогтворжуулна гэж Мөнгөний бодлогодоо тусгажээ. Өнөөдрийн байдлаар инфляц Улаанбаатар хотод 5 хувь, харин хөдөө 5.5 хувь байна.  Харин төгрөгийн ханшийг аль болох сулруулахгүй, макро эдийн засгийн цаг үеэ мэдэрсэн уян хатан бодлогоор удирдана гэж төв банкны удирдлага тайлбарлаж байсан.  Одоо албан ханшаар нэг ам. доллар 3380 төгрөгтэй тэнцэж байна. 

Банкны салбарт өмнө нь өрхийн зээл зонхилж байсан бол өнгөрсөн онд бизнесийн зээл 3.7 их наяд төгрөгөөр тэлсэн. Үүнээс гадна жижиг, дунд үйлдвэрлэл эрхлэгчдийн хувьд бизнесийн зээл авахад барьцаа хөрөнгө гэдэг ханатай нүүр тулдаг байсан бол одоо аж ахуйн нэгжийн бизнесийн худалдах, худалдан авах гэрээг   барьцаанд тооцно гээд ковидын дараагаар макро эдийн засагт гарч байгаа сайн үр дүнг мөнгөний бодлоготой холбон танилцуулсан. Банкны салбарт ногоон санхүүжилтийг дэмжсэн бодлого явуулж, мөн IPO гаргасан компаниудын хувьд хувьцаа цөөн хэдэн хүн дээр хэт төвлөрөхөөс хамгаалсан хуулийн орчинг боловсронгуй болгож, зээлийн хүүг бууруулах бодлого баримталж ажиллана.

Хамгийн эрэлт өндөртэй ипотекийн зээл дээр гэхэд л тухайн зээлдэгч хаана орон сууц худалдан авах гэж байгаагаас шалтгаалан зээлийн хүү нь харилцан адилгүй байх уян хатан зохицуулалтыг хийх цаг болсон. Хэрвээ хотын А бүсэд байр авах бол ипотекийн зээлийн хүү арай өндөр, захын дүүрэг эсвэл суманд бол хүү бага байх схемийг зурж байгаа аж. Мөн ипотекийн зээлийн хүүг бууруулах замаар гадны хөрөнгө оруулагчдыг гаргасан хөрөнгө нь хамагалагдсан, харилцан ашигтай ажиллах нөхцөлийг бүрдүүлэхэд анхаарна. Манай улсад зээлийн хүү хэт өндөр байгаа нь эдийн засаг тэлэхгүй, хүчтэй чадавхжиж чадахгүй  байгаатай холбоотой. Мөнгөний бодлогын хүү өнөөдрийн байдлаар  11 хувьтай байна. Тэгвэл бусад манай улсын эдийн засагт нөлөөлөл өндөртэй  хөрш орнуудын төв банкны  бодлогын хүү ямар байгаа талаар энд нэмэлт мэдээлэл өгөхөд,

БНХАУ-ын Ардын банк энэ оны долдугаар сард хуралдаад, бодлогын хүүгээ 0.1 нэгж хувиар бууруулсан. БНХАУ-ын эдийн засгийн өсөлт 2024 оны хоёрдугаар улиралд 4.7 хувь буюу хүлээлтээс бага гарч, тус улс энэ жилийн 5 хувийн өсөлтийн зорилтдоо хүрэхэд хүндрэлтэй байгаа талаар олон улсын байгууллагуудын тайланд дурдаж байсан. Харин энэ шийдвэрээс хэдхэн хоногийн өмнө болсон Хятадын Коммунист Намын 20 дахь удаагийн Төв хорооны гуравдугаар их хурлын үеэр энэ жилийн эдийн засгийн зорилтдоо хүрэх шаардлагатай байгааг онцолсон юм. Ийнхүү төв банкны зүгээс эдийн засгийн идэвхжлийг дэмжих зорилготой гэнэтийн шийдвэр гаргасан.

Харин ОХУ-ын төв банк бодлогын хүүгээ 2 нэгж хувиар нэмэгдүүлж 18.0 хувьд хүргэв. Тус улсад инфляц 9.1 хувь болж өссөн нь бодлогын хүүгээ өсгөхөд хүргэсэн байна. Энэхүү инфляцын өсөлт нь нэг удаагийн шинжтэй хүчин зүйлсээс ихээхэн шалтгаалсан гэж ОХУ-ын төв банкны зүгээс мэдэгдэж байсан. Үүнээс гадна Европын төв банк  бодлогын хүүгээ хэвээр хадгалах шийдвэр гаргаж,  одоо 2.2 хувь байгаа инфляцыг оны төгсгөлд 2.0 хувийн түвшинд хүргэх тооцоотой ажиллаж байна.