IO Interactive өөрсдийн удаан хүлээлгэсэн бүтээл болох “007 First Light”-ийн анхны кино хэлбэрийн трейлерийг олон нийтэд дэлгэлээ. Энэхүү тоглоом нь Жеймс Бондыг дэлхийн алдарт тагнуул 007 болохоос өмнөх үеэс нь эхлүүлж, MI6-д элссэнээс хойших замналыг шинэ түүхийн агуулгаар харуулах аж.

Бага насандаа аав ээжийгээ алдсан, дотуур байрны амьдралаар өссөн Бондыг эхлээд Их Британийн тэнгисийн цэргийн хүчнээс MI6-д элсүүлж буйгаар түүх өрнөнө. Үүнээс хойш тоглогчид Бондыг хянах болж, түүний Omega бугуйн цаг, Q-ийн лабораторийн шинэ технологийг турших сониуч байдал, болон дэлхий даяар хийж буй тагнуулын даалгавруудад хамт оролцох болно.

Олны анхаарлыг хамгийн их татсан элемент бол The Walking Dead киноны гол дүрүүдийн нэг, жүжигчин Ленни Жеймсийн оролцоо юм. Тэрээр MI6-ийн дотоод удирдлагын нэг болох Жон Гринвэйг бүтээж, Бондын туршлагагүй залуу насыг чиглүүлэгч, ёс суртахууны хөтөчийн үүрэг гүйцэтгэх аж.

IO Interactive энэ тоглоомыг анх 2020 онд “Project 007” нэртэйгээр зарласан ч түүнээс хойш дэлгэрэнгүй мэдээлэл ховор байлаа. Гэвч тус студи төслийн эхнээс л энэ нь өмнөх кинонууд дээр тулгуурлаагүй, шинэ, бие даасан түүх байх болно хэмээн мэдэгдэж байсан.

Энэ удаагийн танилцуулгаар тоглогчид Бондын тагнуулын ажиллагааг “мэдлэг, сэтгэл зүй болон хүч” хослуулан гүйцэтгэх боломжтойг онцолжээ. Тусгай хэрэгсэл ашиглах, орон зайд нуугдах, эсвэл шууд тулаанд орох зэрэг сонголтыг тоглогч өөрөө шийднэ. Hitman цувралын фэнүүдэд танил хувцас солих, дүр эсгэх систем ч мөн энэ тоглоомд багтсан байна.

Тоглоомын гүйцэтгэх захирал Хакан Абракын мэдэгдснээр “007 First Light” нь шинэ гурвалсан цувралын эхлэл болохоор төлөвлөгдөж байгаа аж. Гэхдээ IO Interactive одоогоор Hitman франчайзийг түр зогсоогоод энэхүү тоглоомд бүх анхаарлаа төвлөрүүлж буйг онцолжээ.

“007 First Light” тоглоомыг PlayStation 5, Xbox Series X/S, PC болон удахгүй худалдаанд гарах Nintendo Switch 2 платформуудад нэгэн зэрэг нээлттэй болгохоор төлөвлөсөн байна. Шинэ бүтээл дэлхийн тоглоом сонирхогчдын дунд хүлээлт үүсгээд буй бөгөөд Бондын шүтэн бишрэгчдэд зориулсан хамгийн шинэлэг, сэтгэл догдлом түүх болж чадах төлөвтэй байна.