“SpaceX” компанийн “Falcon 9” пуужинд нислэгийн үеэр асуудал гарч, саатжээ. "Starlink Group 9-3" нэртэй уг нислэг нь 20 хиймэл дагуул тээвэрлэн Ванденберг дэх сансрын хүчний баазаас хөөрчээ. Пуужингийн доод эхний үе амжилттай ажилласан ч дээд хоёрдугаар үе төлөвлөсний дагуу хөдөлгүүрээ асааж чадаагүй байна. Үүний шалтгааныг Илон Маск боломжит шингэн хүчилтөрөгчийн алдагдалтай холбон тайлбарлажээ. 

Тэгвэл Холбооны нисэхийн удирдах газраас (FAA) ослын шалтгааныг тодруулах мөрдөн байцаалтад хяналт тавьж ажиллаж буй. “SpaceX” компани “Falcon 9” пуужингаа дахин хөөргөхөөс өмнө эцсийн тайлан болон шаардлагатай засварууддаа FAA-аас зөвшөөрөл авах ёстой аж. Энэхүү саатал нь удахгүй хэрэгжиж эхлэх байсан төслүүдэд нөлөөлжээ. Үүнд “Polaris Dawn” болон NASA-ийн “Crew-9” гэсэн хоёр багийн нислэг багтаад буй.

Хэдийгээр “SpaceX” компани 20 ширхэг “Starlink” хиймэл дагуулыг хөөргөсөн ч төлөвлөсөн тойрог замдаа байрлуулж чадаагүй байна.

“Falcon 9" арван жилийн турш асуудалгүй ажиллаж ирсэн бөгөөд 2015 оны зургаадугаар сараас хойш 300 гаруй амжилттай нислэгийг үйлджээ.