Одоо байгаа зах зээлийн багтаамжаа харвал манайх ажиллах хүчнээр төдийлөн дутахааргүй нөөцтэй улс гэсэн ангилалд оржээ.

Гэвч ажил олгогч талд элдэв төрлийн татвар, хураамж, харин ажиллагч талаас цалин хөлсний бага байдлаас шалтгаалан хүн ажилд авна гэдэг 2025 онд хөдөлмөрийн зах зээлийн том сорилт хэвээр байна. 

ГБХНХЯ-аас гаргасан судалгаагаар дотоодын хөдөлмөрийн зах зээлд 85 мянган ажлын байр эзнээ хүлээж байна гэсэн судалгааны дүн гарчээ.   

Мөн бүртгэлтэй аж ахуйн нэгжүүдийн 56 хувь нь үйл ажиллагаа явуулахгүй, зөвхөн цаасан дээр бүртгэлтэй. 

Мөн манай орон жилийн 4 улиралтай тул хөдөлмөрийн зах зээл, иргэдийн орлого дулааны улиралдаа л нэмэх баланстай ихэвчлэн гардаг. 

Хөдөлмөрийн зах зээлд улирлын нөлөөлөл байнга ажиглагддаг бөгөөд нэг жилийн ажиллах хүчний эрэлтийн гурван ажлын байр тутмын хоёр нь оны эхний хагас жилд бий болох хандлагатай байдаг. 

Сүүлийн 10 жилийн хувьд улсын хэмжээнд ажиллах хүчний эрэлт 52.0 мянгаас 95.0 мянгын хооронд хэлбэлзэж, дунджаар 76.2 мянга байсан бол 2025 оны хувьд энэ үзүүлэлт 83.7 мянга болсон байна. 

УИХ-ын ирэх хаврын чуулганаар татварын хуульд өөрчлөлт орвол хөдөлмөрийн зах зээлд эерэг өөрчлөлт нь 2 жилийн дараа гарна гэсэн хүлээлт нийгэмд байна.