Монголбанк 2025 оны дөрөвдүгээр сард нийт 1,097.1 килограмм үнэт металл худалдан авсан талаар мэдээллээ. Ингэснээр оны эхнээс буюу нэгдүгээр сараас хойш нийт 3.3 тонн үнэт металл авч, өмнөх оны мөн үетэй харьцуулахад 22.1 хувиар буурсан үзүүлэлттэй байна.

Үнэт металл буюу алтны худалдан авалт буурахад хэд хэдэн хүчин зүйл нөлөөлсөн байж болзошгүй ч Монголбанкнаас албан ёсоор тайлбарлаагүй байна. Гэхдээ сүүлийн саруудад дэлхийн зах зээл дээр алтны үнэ хурдацтай өсөж байгаа нь олборлогчдод үнэ тогтворжихыг хүлээх хандлагыг төрүүлж байж болзошгүй юм. Үүний улмаас олборлосон алтаа түр нөөцлөх, зах зээлийг ажиглах хандлага нэмэгдэж, төв банктай хийдэг арилжаа буурахад нөлөөлсөн бололтой.

Орон нутгийн салбаруудаар авч үзвэл, Дархан-Уул аймаг дахь Монголбанкны хэлтэс оны эхнээс нийт 126.5 килограмм, Баянхонгор аймаг дахь хэлтэс 511.3 килограмм үнэт металл худалдан аваад байна. Энэ нь алт тушаалт газарзүйн хувьд төвлөрөлтэй хэвээр байгааг харуулж байна.

Монголбанк үнэт металлыг худалдан авахдаа Лондонгийн металлын бирж болон дэлхийн зах зээлийн үнийн түвшинг үндэслэж тухайн өдрийн Монголбанкны албан ханшаар тооцон дотоодын зах зээлд үнэ тогтоодог. 2025 оны дөрөвдүгээр сард алт худалдан авалтын дундаж үнэ нэг грамм тутамд 364,736.61 төгрөгт хүрснээр өмнөх саруудтай харьцуулахад харьцангуй өндөр хэвээр байна.

Монголбанкны зүгээс үнэт металл, тэр дундаа алт худалдан авах бодлого нь гадаад валютын нөөцийг нэмэгдүүлэх, төгрөгийн тогтвортой байдлыг хангахад томоохон үүрэгтэй юм.