- “Apple” компани энэ намраас "Apple Intelligence" нэрийн дор iOS 18, iPadOS 18, macOS Sequoia дээр ашиглах боломжтой хиймэл оюуны шинэчлэлүүд хийхээ зарлалаа.
- “Хиймэл оюун өгөгдлийг сервер рүү илгээхээс илүүтэй хэрэглэгчийн төхөөрөмж дээр шууд боловсруулна.
- "Genmoji" аппликэйшнээр хүссэн эможигоо бүтээх боломжтой.
![](/_next/image?url=https%3A%2F%2Fcnbc.mn%2Fassets%2Fnews_thumbnail%2F3f70602f-3b71-46a7-9a11-95c097ffd514.png&w=1080&q=100)
“Apple” компани энэ намраас "Apple Intelligence" нэрийн дор iOS 18, iPadOS 18, macOS Sequoia дээр ашиглах боломжтой хиймэл оюуны шинэчлэлүүдийг танилцуулсан юм. Гэвч хүлээлт үүсгээд байсан эдгээр функцийг зөвхөн M1 эсвэл M2 чиптэй, iPhone 15 Pro болон Pro Max зэрэг хамгийн сүүлийн үеийн төхөөрөмжүүд л дэмжих аж.
Харин хувийн нууцлалтай холбоотой асуудалд, “Хиймэл оюун өгөгдлийг сервер рүү илгээхээс илүүтэй хэрэглэгчийн төхөөрөмж дээр шууд боловсруулна. Харин их тооцоолол шаардлагатай тохиолдолд “Apple”-ийн серверүүд өгөгдлийг боловсруулах боловч хадгалахгүй, цааш хандах эрхгүй байна” хэмээн “Apple” компанийн зүгээс мэдэгджээ.
"Apple Intelligence"-д багтаж буй гол шинэчлэлүүдээс дурдвал:
1. ChatGPT-ийн нэгдэл
“Siri”, “Mail”, “Pages” тэргүүтэй “Apple”-ийн аппликейшнд “OpenAI” компанийн ChatGPT туслах функц болон орж, аливаа асуултын хариулт, бүтээлч контент, шинэ санаа олоход туслах аж.
2. Хиймэл оюунаар сайжруулсан Siri
Apple Intelligence-ийн тусламжтайгаар хувийн туслах Siri өгөгдсөн агуулгыг илүү сайн ойлгохоос гадна, Apple-ийн аппликэйшн дээр нарийн төвөгтэй хүсэлтүүдийг шийдвэрлэх, даалгавруудыг нарийвчлалтай гүйцэтгэх аж. Жишээлбэл, “Ээжийн минь онгоц хэзээ буух вэ?” гэдэг асуултад Siri нислэгийн бодит цаг, имэйлээр ирсэн мэдээлэл зэрэгт үндэслэн нислэгийн хуваарийн шинэчлэлтийг өгөх боломжтой юм.
3. Хиймэл оюун дэмждэг “Writing Tools”
Хэрэглэгчийн бичвэрт дүгнэлт хийх, хянах, засварлах, товчлох, өнгө аясыг нь илүү найрсаг, мэргэжлийн болгон өөрчлөх боломжтой “Writing Tools”-ийн шинэ хувилбарыг мөн танилцуулжээ.
4. Зураг үүсгэгч
"Image Playground"-ийг тусдаа аппликейшн болгон хөгжүүлснээс гадна “Messages”, “Keynote”, “Freeform” зэрэг аппликейшнд туслах функц хэлбэрээр суурилуулах зураг үүсгэх хэрэгсэл юм. Үүгээр хэрэглэх түлхүүр үгс ашиглан хүссэн зургаа үүсгүүлэх боломжтой. Түүнчлэн "Genmoji"-г танилцуулсан бөгөөд “гулгаж буй үлэг гүрвэл” гэх мэтээр хүссэн эможигоо үүсгэх боломжтой аж.
4. Дуудлага бичих чадвар
“Notes” болон “Phone” аппликейшн дуудлага бичих, яриаг текст болгон буулгах, харилцан ярианд дүгнэлт хийх зэрэг үндсэн функцтэй болох аж. Дуудлага бичиж эхлэхдээ хэрэглэгчдэд энэ тухайгаа автоматаар мэдэгдэнэ хэмээн тус компанийн зүгээс дурдлаа.