Биткойны ханш зургадугаар сараас хойш анх удаа 70,000 ам.долларт хүрлээ. Уг өсөлтөд арилжааны сангийн хөрөнгө оруулалт болон АНУ-ын Ерөнхийлөгчийн сонгуулийн боломжит үр дүнгийн талаарх таамаглал түлхүү нөлөөлжээ.

Сингапурын мягмар гарагийн өглөөний арилжаагаар биткойны ханш 1 хувиар өсч, 69,840 ам.долларт хүрчээ. 

АНУ-ын Ерөнхийлөгч асан Дональд Трамп өөрийн сонгуулийн кампанит ажлын үеэр биткойныг хүлээн зөвшөөрч, дэмжихээ илэрхийлж, сонгуулийн хандивыг биткойноор хүлээн авахаа мэдэгдсэн юм. Сонгуулийн үр дүнг урьдчилан таамаглах судалгааг Трамп тэргүүлж байгаа бөгөөд энэхүү мэдээлэл нь биткойны ханшид нөлөөлжээ.

Харин Трампын эсрэг өрсөлдөж буй тус улсын Ардчилсан намаас нэр дэвшигч Дэд ерөнхийлөгч Камала Харрис криптовалютын салбарын зохицуулалтыг дэмжихээ амлаад буй. 

Сонгуульд хэн ялахаас үл хамааран биткойны ханш арваннэгдүгээр сарын эцэс гэхэд 80,000 ам.долларт хүрнэ хэмээн салбарын шинжээчид таамаглаж байна. Биткойны ханш энэ онд 66 хувиар өссөн үзүүлэлттэй байна.

АНУ-ын Ерөнхийлөгчийн сонгууль ирэх сарын 5-нд зохион байгуулагдах юм.