Эрдэнэт үйлдвэрийн дэргэд зэс хайлуулах үйлдвэрийг шинээр барихад өнөөдрийн байдлаар 222 тэрбум төгрөг буюу 68 сая ам.долларын хөрөнгө оруулалт хийгээд байна.

Үйлдвэрийг байгуулахад хамгийн чухал байгууламж болох дэд бүтцийн ажлууд төлөвлөгөөний дагуу хийгдээд явж байна. Тухайлбал, авто замын ажлын гүйцэтгэл 58 хувьтай. Төмөр замын ажил 92 хувьтай, усан хангамж 85 хувь, хашаа хамгаалалтын бүс 93 хувьтай явж байгаа бол цахилгаан хангамжийн ажлын ТЭЗҮ нь бэлэн болоод, тендер нь зарлагджээ. Энэ үйлдвэр ашиглалтад орсноор зэсийн баяжмалаа боловсруулалт хийлгүй шууд экспортод гаргадаг байдлыг халж, нэмүү өртөг шингэсэн бүтээгдэхүүн хийж зах зээлд нийлүүлэх боломж бүрдэнэ.

Урьдчилсан тооцооллоор жилдээ 124 мянган тн катодын зэс үйлдвэрлэнэ. Мөн зэс утас, кабель үйлдвэрлэдэг болоход 22 сая ам.доллар, зэс нано нунтгийн үйлдвэр,  молбидений үйлдвэрт 40 сая ам.долларын хөрөнгө оруулалт тус тус хийгээд байна. Засгийн газраас энэ үйлдвэрийг 2025 онд ашиглалтад оруулах чиглэл өгсөн. Бид үйлдвэрээ энэ хугацаанд ашиглалтад оруулахаар ажиллаж байна гэж үйлдвэрийн удирдлага хэвлэлийнхэнд ярилцлага өгөхдөө танилцууллаа. 

Шинээр барьж байгаа үйлдвэр нь катодын зэс, зэс утас, кабель, зэс нано нунтаг, мобиден үйлдвэрлэлэнэ.

Уулын баяжуулах Эрдэнэт үйлдвэр Зэс хайлуулах үйлдвэртэй болно гэж 37 жил ярьж, нийтдээ 27 жил судалгаа хийжээ. Одоогийн баримталж байгаа технологийг үйлдвэрийн хүчин чадал, ордын ирээдүйн нөөц зэргийг тооцон 2014 онд сонгожээ.