Аз жаргалтай амьдралын нууц юунд оршдог вэ? Энэ бол хүн төрөлхтний амьдралынхаа туршид асуудаг нууцлагдмал асуултуудын нэг юм. Харин уг сэдвийг судлахын тулд Стэнфордын туслах профессор Рон Гутман карьерынхаа ихэнх хугацааг зориулжээ.

Гутман бол Стэнфордын туслах профессор, бизнес эрхлэгч, зохиолч, илтгэгч, шагналт зохион бүтээгч юм. 

Хүний аз жаргалын талаар илүү ихийг мэдэхийн тулд бодит ертөнцийн судалгааг хийх шаардлагатай хэмээн үзэж тэрбээр энэ оны аравдугаар сард Гималайн нурууны зүүн нуруунд орших Бутаны хаант улсыг зорьжээ.

Бутан нь Гималайн нуруунд оршдог тул Гутман ихэнх аяллынхаа хугацааг явган аялал болон ууланд авиралтад зарцуулсан байна. Аяллын туршид тэрбээр тус улсын байгалийн гайхамшигт тогтцыг бишрэн иржээ.

Аз жаргалын түлхүүр: Энгийн байдал

Тэгвэл хүний аз жаргалын түлхүүр юу вэ? Гутманы дүгнэлтээр хүний аз жаргалын түлхүүр бол - энгийн байдал аж.

“Судлах тусам аз жаргал гэдэг нь ухамсартай шууд холбоотой гэдгийг улам ихээр ойлгож байсан” хэмээн Гутман дурджээ.

Тэрбээр нутгийн хүмүүсийг ажиглаж, орон нутгийн лам нартай ярилцахдаа аз жаргал нь ухамсартай холбоотой гэдгийг ойлгож, энэхүү ухамсрыг байгальтай ойр байснаар олох боломжтой хэмээлээ.

“Орчин үеийн соёлд бид гадаад хүчин зүйлсэд маш их төвлөрдөг, бид бараг хоригдол шиг л байдаг "гэж Гутман хэлэв. "Харин байгаль яг эсрэгээрээ, байгаль зүгээр л байж байдаг, оршиж байдаг” хэмээн тэрбээр нэмж онцоллоо.