Бодит байдал:

Төрийн үүрэг иргэнээ ажилтай орлоготой, аюулгүй амьдрахад нь дэмжлэг үзүүлэх ёстой. Гэтэл төр нь өөрөө буюу төрийн байгууллагууд нь нийлж байгаад хуулиас давсан журам дотооддоо баталж, энэ бүхнийг давж гараад бизнесээ, үйлдвэрлэлээ эрхлээрэй гэж тохуурхах болоод удаж байна.  

Харь улсад ажил хийж хуримтлуулсан мөнгөөрөө эх орондоо үйлдвэрлэл эрхлэхээр, энгийн кофе шоп, ресторан нээхээр ирдэг ч энэ олон журамд ээрэгдэж, танил талгүй хэцүү юм байна гээд эргээд буцсан олон залуусыг бид мэднэ.

 Баримт:

Энд ганц жишээ татъя... 

Иргэн “Б”, “Н” нар  цэцэрлэг байгуулахын тулд 93, эмийн сан ажиллуулахын тулд 138 шат дамжлага давна.

Орон нутагтаа жижиг дунд үйлдвэр эрхлэх,  эсвэл эмийн сан нээхэд ч ийм л хэмжээний баримт бичиг бүрдүүлж, эцэст нь шантарч шинэ санаагаа орхих эсвэл ажлаа амар  бүтээхийн тулд тэр дүрэм, журмыг мөрдөхийг шаарддаг этгээдэд авлига өгөх замаар асуудлаа шийдүүлдэг гаж тогтолцоо бий болоод удаж байна.

 

Статистик:  

Өнөөдөр 251 төрлийн тусгай зөвшөөрлийн 122 нь хуулиас давсан журмаар зохицуулагдаж байна. 

Анх 2022 онд 360-аас илүү зөвшөөрөл байхгүй гэж хуульчилсан ч хоёр жилийн дотор 16 шинэ зөвшөөрөл нэмэгдэж, 10 жилийн дараа 160 болж өсөх магадлалтай.

Тэгвэл энэ асуудлыг Засгийн газраас өөрчлөхөөр болжээ. 

Яаж өөрчлөх вэ? 

Зөвшөөрлийн тогтолцоог цэгцлэхгүй бол хориглолтын иж бүрэн систем болж хувирсан гэдгээ хүлээн зөвшөөрч, “Бизнест ээлтэй монгол” болохын тулд  ЗГХЭГ-ын дарга Н.Учралаар ахлуулсан ажлын хэсэг ажиллаж байна. Ингээд 2022 онд  УИХ-аас баталсан 360 зөвшөөрлөөс илүү байх ёсгүй гэсэн заалтын дагуу энэ олон журам дүрмийг цуцална.  

Үүгээр ч зогсохгүй одоо байгаа 251 төрлийн тусгай зөвшөөрлийн 122 нь хуулиас давсан журмаар зохицуулагдаж байгааг ил тод болголоо. 

Ингээд зөвшөөрөл олгодог эрх бүхий байгууллагуудад хууль хэрэгжүүлэхийг үүрэг болгож, 7 хоногийн  хугацаатай үүрэг даалгавар өглөө. 

Зөвшөөрлөөс давсан “бүртгэл, журам”-ын хориглолтын жагсаалтыг ил тод болголоо.

 

 Энэ тухай ЗГХЭГ-ын дарга Н.Учрал өөрийн Фэйсбүүктээ ингэж бичжээ.

"...Миний бие 2022-2024 онд Цахим хөгжил, харилцаа холбооны сайдаар ажиллах үедээ “ШИЛ” ажиллагааны хүрээнд “Нийтийн мэдээллийн ил тод байдлын тухай” хуулийн хэрэгжилтийг эрчимжүүлж 68 төрлийн 970.355 /мөр өгөгдөл/ мэдээллийг нээлттэй, ил тод хаанаас ч харах боломжтой болгож shilen.gov.mn байршуулсан. Энэ бол мэдээллийг ил тод болгох анхны том өөрчлөлт байсан.  

Өөрөөр хэлбэр хэн, хаана хэдэн газар эзэмшиж байгаагаас эхлээд тусгай сангийн зарцуулалтын мэдээлэл, төрийн оролцоотой хуулийн этгээдийн ТУЗ-ийн гишүүдийн нэрс, цалин урамшуулал гээд хаалттай бүхнийг ил тод болгосноор иргэн хүнд төсөвт, төрийн өмчид хяналт тавих дата дэд бүтцийг бий болгож өгсөн юм.

2024 оны долдугаар сард ЗГХЭГ-ын даргаар томилогдсон даруйд Төрийн өмчит компаниудын ашиг алдагдал, улсын төсөвт төвлөрүүлсэн татварын мэдээллийг нээлттэй болгож,  soe.gov.mn-д байршуулсан.  

Үр дүнд иргэд Монгол Улсын Үндсэн хуульд заасан мэдээлэл хайх, хүлээн авах үндсэн эрхээ эдэлж хаана авлига, ашиг сонирхол байгааг олж харж түүний эсрэг Засгийн газартайгаа хамтарч дуу хоолойгоо нэгтгэн шахаж шаарддаг, өөрчилж чаддаг эрүүл тогтолцоог бүрдүүлэх эхлэлийг тавьж чадсан билээ.

Тэгвэл энэ удаа бизнес эрхлэгчдэд дарамт тээг, төрийн хүнд суртал, авлига ашиг сонирхлын гол нугалаа болсоор ирсэн зөвшөөрлөөс давсан “БҮРТГЭЛ, ЖУРАМ”-уудын жагсаалтыг та бүхэнд хүргэж байна.  

Эдгээр хууль давсан бүртгэл, журмыг 7 хоногийн дотор цуцлах үүрэг даалгаврыг эрх бүхий байгууллагуудад “Бизнест ээлтэй Монгол” санаачилгын хүрээнд өглөө. 

Хууль давсан бүртгэл, журмаа цуцалж чадах эсэхийг та бид олуулаа харж, хянаж, шаардацгаая" гэжээ.

Хүлээлт: 

Одоо олон нийт аль аль салбарт ямар, ямар журам байсныг  цуцлагдсаныг нэр заан 7 хоногийн дараа зарлахыг хүлээж байна.