Нийслэлд сургууль, цэцэрлэгийн хүртээмжийг нэмэгдүүлэх бүтээн байгуулалтын ажлууд үргэлжилж байгаа ч шинэ барилгууд тоног төхөөрөмжийн асуудлаас болж ашиглалтад бүрэн орохгүй байгаа аж. 

Энэ онд 139 сургууль, цэцэрлэгийн барилгын ажлыг эхлүүлснээс өнөөдрийн байдлаар 15-ыг нь ашиглалтад оруулжээ. Гэвч Боловсролын яамнаас ширээ, сандал, сургалтын хэрэглэгдэхүүн, гал тогооны тоног төхөөрөмжийг шийдвэрлэж өгөх боломжгүй гэсэн нь нийтдээ сургуулийн насны 10,500 гаруй, цэцэрлэгийн насны 3,740 хүүхэд гэрийнхээ ойролцоо шинэ сургууль, цэцэрлэгт суралцах боломжгүйд хүргээд байна.

Ийнхүү нийслэлийн хэмжээнд 20 цэцэрлэг, 13 сургууль тоног төхөөрөмжийн хүрэлцээгүйгээс хичээл сургалтын үйл ажиллагаа эхлүүлэх боломжгүй байгаа юм.

Сонгинохайрхан дүүргийн 24 дүгээр хороо, 179 дүгээр бага сургууль, цэцэрлэгт ажилласан нийслэлийн Засаг даргын орлогч А.Амартүвшин “Барилгын ажлыг энэ оны тавдугаар сарын 7-нд дуусгаж, ашиглалтад оруулсан ч тоног төхөөрөмжийн асуудал шийдэгдээгүйгээс сурагчдаа хүлээн авч чадахгүй байна. Үүний улмаас Баруун салаа орчмын 350 гаруй хүүхэд гэрээсээ зургаан буудлын зайд орших сургууль, цэцэрлэг рүү явах нөхцөл байдал үүссэн” хэмээн онцлов.

Нийслэлийн удирдлагууд шинээр ашиглалтад орсон сургууль, цэцэрлэгүүдийн тоног төхөөрөмжийг шийдвэрлэхийг хүссэн албан бичгийг холбогдох байгууллагуудад удаа дараа хүргүүлсээр байна.