Зуны Олимпын 33 дахь удаагийн наадам зохион байгуулагдаж буй Парис хотоос олон аялагчид зайлсхийж байна. 

“Олимпын наадмыг зохион байгуулж буй хотуудад аялагчдын тоо эрс нэмэгддэг гэх ойлголт нь нийтлэг ташаа ойлголт юм” хэмээн нислэг, агаарын тээврийн мэдээллийн шинжилгээний OAG компанийн ахлах шинжээч Жон Грант ярьж байна.

“Лондон, Афин, Атланта хотууд зуны наадмыг зохион байгуулах үеэр жуулчдын тоо буурсан” хэмээн тэрбээр онцоллоо.

Франц улсын агаарын тээврийн “AirFrance-KLM” компани Олимпын наадмын улмаас их хэмжээний алдагдал хүлээж буйгаа өнгөрсөн долоо хоногт мэдэгдлээ. Энэ зун Парис хотыг зорих аялагчдын тоо бага байгаа тул тус компани энэ оны гуравдугаар улирлын орлого 163-184 сая ам.долларт хүрнэ хэмээн таамаглажээ. "Олон улсын зах зээл Парисаас ихээхэн зайлсхийж байна" гэж тус компани мэдэгдсэн байна.

Олимпын наадам зохион байгуулагдаж байгаатай холбогдуулан зах зээлд олон улсын агаарын тээвэрлэлт 2023 онтой харьцуулахад зургадугаар сард 8 хувь, долдугаар сард 15 хувиар тус тус буурна хэмээн Парисын аялал жуулчлалын зөвлөл зургадугаар сард гаргасан аялал жуулчлалын тайланд тэмдэглэжээ.

Зөвхөн агаарын тээвэр гэлтгүй Парис дахь зочид буудлуудын эрэлт мөн адил сул байгаа аж. Энэ оны долдугаар сарын эхээр зочид буудлын ачаалал 60 хувиар буурч, Олимпын үеэр зочид буудлуудын дундаж үнэ 70 гаруй хувиар өссөн үзүүлэлттэй байна.

“Airbnb” түрээсийн байрнууд эрэлт буурсантай холбогдуулан үнээ 50 гаруй хувиар хямдруулсан байна. 

Олимпын наадмын нийт 10 сая ширхэг тасалбар худалдаанд гарснаас 8.95 сая тасалбар зарагдсан бөгөөд аялагчид наадмын тасалбарыг авах боломжтой хэвээр байгаа аж.