- Бөөрөлжүүтийн цахилгаан станц 150 МВт-ын хүчин чадал бүхий 4 блокоос бүрдэх бөгөөд эхний блок нь ашиглалтад орлоо.
- Станц бүрэн хүчин чадлаараа ажиллаж эхэлснээр Монгол Улсын эрчим хүчний хэрэглээний 20-30 хувийг найдвартай, хямд эх үүсвэрээр хангана.
- Улаанбаатар бондыг арилжаалж олсон 300 тэрбум төгрөгийг Бөөрөлжүүтийн станцад хөрөнгө оруулжээ.
Төв аймгийн Баянжаргалан сумын нутагт байрлах Бөөрөлжүүтийн 600 МВт-ын цахилгаан станцын эхний блок 150 МВт-ын цахилгаан станц ашиглалтад орлоо.
Бөөрөлжүүтийн цахилгаан станц дэвшилтэт технологиор баригдаж байна.Үүнд;
Түлшний бүрэн шаталт явагдах хос циклонт эргэлтэт буцламтгай үет зуух /CFB/
Цахилгаан статик шүүлтүүр /ESP/, утааны хэм дэх тоосны гарцыг дөрөв дахин бууруулах систем
Дахин халаагчтай конденсацын уурын турбин
Үйлдвэрлэлийн саарал усыг дахин боловсруулах ногоон байгууламж, технологит ашиглах систем
Усны алдагдалгүй агаарын хөргөлтийн конденсатор /ACC/
Монгол дахь анхны 220 кВ-ын хийн хөндүүрүүлэгч хуваарилах байгууламж /GIS/ зэргээс бүрджээ.
Энэ станц нь 150 МВт-ын хүчин чадал бүхий 4 блокоос бүрдэнэ. Хоёрдугаар блок 2025 оны аравдугаар сард, гуравдугаар блок 2027 онд, дөрөвдүгээр блок 2028 онд ашиглалтад орно. Станц бүрэн хүчин чадлаараа ажиллаж эхэлснээр Монгол Улсын эрчим хүчний хэрэглээний 20-30 хувийг найдвартай, хямд эх үүсвэрээр хангана. Мянга гаруй байнгын ажлын байр шинээр бий болж, төмөр зам, хатуу хучилттай авто зам, бусад инженерийн дэд бүтэц бүхий 2000 гаруй хүн амтай суурьшлын бүс бий болно.
Төслийг төр, хувийн хэвшлийн түншлэлээр хэрэгжүүлж, Улаанбаатар хот анх удаа 500 тэрбум төгрөгийн бонд босгож тус станцад 300 тэрбум төгрөгийн хөрөнгө оруулжээ.
Энэхүү бүтээн байгуулалтын гүйцэтгэгчээр Эрчим хүчний яам, Нийслэлийн засаг даргын тамгын газар, “Бодь” групп, “Цэцэнс майнинг энд Энержи” ХХК ажилласан.
Мөн Төв аймгийн Баян суманд 660 МВт-ын ДЦС байгуулах төсөл хэрэгжиж байна. Эрчим хүчний яам, “Касэн пауэр грийн энержи” компани хамтран уг төслийг хэрэгжүүлж байна. Станцын барилга угсралтын ажлыг 2025 онд эхэлж, 2028 онд ашиглалтад оруулахаар төлөвлөжээ. Тус станц ашиглалтад орсноор жилдээ 3,7 тэрбум кВт цаг цахилгаан эрчим хүч төвийн эрчим хүчний нэгдсэн сүлжээнд нийлүүлж, нэмэлтээр 100 кГц дулаан үйлдвэрлэх боломжтой. Ингэснээр нийслэлийн Багахангай дүүрэг, Төв аймгийн Баян сумын өсөн нэмэгдэж буй эрчим хүчний хэрэглээг бүрэн хангаж төвийн болон өмнөд бүсийн стратегийн ач холбогдол бүхий орд газрууд, аж үйлдвэрийн төслүүд цахилгаан эрчим хүчний найдвартай эх үүсвэрээр хангагдах боломж бүрдэнэ. 
