“Ferrari” машиныг сонирхох залуусын тоо өссөөр байна. Тус компанийн гүйцэтгэх захирал Бенедетто Виньягийн мэдээлснээр, шинэ худалдан авагчдын 40 хувь нь 40-өөс доош насныхан байгаа аж. Энэ тоо ердөө 18 сарын өмнө 30 хувьтай байсан нь “Ferrari”-ийн хэрэглэгчдийн нас улам залуужиж буйг харуулж байна.

Хязгаарлагдмал тоогоор машинаа үйлдвэрлэдэг нь “Ferrari” брэндийн гол онцлог бөгөөд ихэнх худалдан авагч нь өмнө нь “Ferrari” эзэмшиж байсан үйлчлүүлэгчид байдаг.  Тухайлбал, 78 настай нэгэн үйлчлүүлэгч “Хоёр жил хүлээж чадах эсэхээ мэдэхгүй” гэж хэлж байсан удаатай аж. Харин 37 настай залуу “Би 40 нас хүрэхээсээ өмнө Ferrari-гаа унахыг хүсэж байна” гэхэд хариуд нь “39 насандаа авч амжина аа” гэж хошигножээ.  

“Ferrari” энэ оны аравдугаар сарын 9-нд анхны бүрэн цахилгаан автомашинаа танилцуулах бөгөөд энэ нь компанийн гаргах зургаан шинэ загварын нэг юм. Уламжлалт болон хайбрид хөдөлгүүртэй загварыг илүүд үзэх хэрэглэгчид зонхилж байгаа ч, цахилгаан хөдөлгүүртэй загвар сонирхох хүмүүсийн тоо ч нэмэгдэж байгаа аж.