Жижиг бизнес эрхлэгчид өөрсдийн сошиал медиа хаяг, вэбсайт болон мэдээллийн захидалд (ньюслеттер) зориулан их хэмжээний контент бүтээх шаардлагатай байдаг ч ихэнхдээ үүнд зарцуулах цаг, нөөц хомс байдаг. Тиймээс тэд мэргэжлийн дизайнер хөлслөх, эсвэл өөрсдөө график хийхээс илүүтэй, цаг болон зардлаа хэмнэхийн тулд бэлэн график загвар худалдан авдаг.

Хэрэв та график дизайны ур чадвартай бол энэхүү эрэлт хэрэгцээг ашиглан бэлэн загвар бүтээж, гэрээсээ нэмэлт орлого олох боломжтой. Энэ чиг хандлага сүүлийн жилүүдэд улам бүр эрчимжиж байна. Жишээлбэл, “Instagram” пост, цахим ном, вэбсайт, эсвэл бүтээгдэхүүний сав баглаа боодол зэрэгт зориулсан бэлэн загваруудыг бүтээж борлуулж болно. Загвараа бүтээж, худалдан авагчдад өөрсдийн хэрэгцээнд тохируулан өөрчлөх боломжтой холбоос илгээхэд “Canva” зэрэг платформыг ашиглах нь хамгийн түгээмэл байдаг.

Эхлэхээсээ өмнө “Etsy”, “Creative Market”, “Canva” зэрэг платформ дээр судалгаа хийж, ямар төрлийн загварууд илүү эрэлттэй байгааг болон тэдгээрийн үнийг тодорхойлох нь чухал. Тухайлбал, жижиг хэмжээний загварын багц 5 ам.доллароос эхэлж борлуулагддаг бол том хэмжээний багц 165 ам.долларт хүрдэг байна. Гэхдээ платформ бүрийн шимтгэлийн хувь харилцан адилгүй. Жишээлбэл, “Etsy” борлуулсан дүнгээс 6.5 хувийн шимтгэл авдаг бол “Creative Market” борлуулалтын 50 хувийг шимтгэлд авдаг. Харин “Canva” платформ дээр таны бүтээл эхлээд бүртгэгдэж, баталгаажсан байх шаардлагатай бөгөөд загварыг тань ашиглах бүрт танд роялти хэлбэрээр орлого орох аж.

Бэлэн график загварын эрэлт өсөн нэмэгдэж байгаа тул энэ салбар танд гэрээсээ, багахан хүчин чармайлтаар пассив орлого олох сайхан боломжийг олгох юм.