Энэтхэг улс нийт 15 тэрбум ам.долларын хөрөнгө оруулалтаар хагас дамжуулагчийн гурван үйлдвэр байгуулах төслийг албан ёсоор баталлаа.

“Энэтхэг улс чип загварчлалын чадварыг хэдийнэ гүн эзэмшсэн. Эдгээр нэгжээр дамжуулан чип үйлдвэрлэх чадавхыг хөгжүүлнэ” хэмээн тус улсын Засгийн газар албан ёсны мэдэгдэлдээ дурджээ.

Энэтхэг улс АНУ, Өмнөд Солонгос зэрэг улстай мөр зэрэгцэн чип үйлдвэрлэлийн салбарт дэлхийд тэргүүлэхийг эрмэлзэж байгаа юм.

Тус улсын “Tata Electronics” компани Тайваньд төвтэй “Powerchip Semiconductor Manufacturing Corp”-тай (PSMC) хамтран Гужарат мужийн Долера хотод нийт 11 тэрбум ам.долларын хөрөнгө оруулалттай үйлдвэр байгуулахаар болжээ.

PSMC нь чипийн логик болон санах ойн бүрэлдэхүүн хэсгүүдийн дизайн, үйлдвэрлэлийн үйлчилгээг санал болгодог компани юм. Одоогоор тус компани Тайваньд хагас дамжуулагчийн зургаан үйлдвэртэй аж.

Тус үйлдвэр нь автомашин, хэрэглээний цахилгаан бараа, батлан хамгаалах зэрэг салбарт ашиглагддаг чипийн үйлдвэрлэлд түлхүү анхаарлаа хандуулахаар төлөвлөж байна.

Түүнчлэн “Tata Semiconductor Assembly” болон “Test Pvt Ltd” компани хамтран 3.26 тэрбум ам.долларын хөрөнгө оруулалтаар Ассам мужийн Моригаон хотод мөн шинэ үйлдвэр байгуулахаар болсон байна.

Харин гурав дахь үйлдвэрийг Энэтхэгийн “CG Power” компани Японы “Renesas Electronics Corporation”, Тайландын “Stars Microelectronics” компанитай хамтран Гужарат мужийн Сананд хотод байгуулахаар болжээ.

Энэхүү үйлдвэр нь хэрэглэгчийн технологиос гадна аж үйлдвэр, автомашин үйлдвэрлэл, эрчим хүчний салбарын чип үйлдвэрлэхээр төлөвлөжээ. Уг төслийн хөрөнгө оруулалт нь ойролцоогоор 1 тэрбум ам.доллар байх аж.

Эдгээр үйлдвэрийн бүтээн байгуулалтыг ирэх улиралд багтаан эхлүүлэхээр бэлтгэж байна. Үйлдвэр ашиглалтад орсноор дэвшилтэт технологийн салбарт 20 мянган ажлын байр, шууд бусаар 60 мянга орчим ажлын байр шинээр бий болгох юм.

Дэлхийн чип үйлдвэрлэгчид геополитикийн тодорхойгүй байдлын улмаас үйл ажиллагаагаа олон улсад тэлэх, төрөлжүүлэхийг эрмэлзэж байгаа нь Энэтхэг зэрэг улсад эергээр нөлөөлж буй.