АНУ-ын автомашины зах зээлд урьд өмнө байгаагүй эрчимтэй худалдан авалт өрнөж байна. Учир нь хэрэглэгчид Дональд Трампын Засаг захиргаанаас хэрэгжүүлж буй өндөр импортын татвар хэрэгжихээс өмнө хямд үнэтэй автомашин худалдан авахыг хичээж байгаа нь нөөцийн огцом бууралтад хүргэжээ.

Авто салбарын судалгааны байгууллага Cox Automotive-ийн мэдээлснээр, шинэ автомашины хоногийн нөөц гуравдугаар сарын эхээр 91 хоног байсан бол энэ сард 70 хоног болж, ердийн хэлбэлзлээс даруй гурав дахин огцом буурсан байна. Хуучин автомашины нөөц мөн 39 хоног болж буурчээ.

Тус компанийн ерөнхий эдийн засагч Жонатан Смоук “импортын татвар нэмэгдэхээс өмнө автомашин авах гэсэн хэрэглэгчдийн эрэлт огцом нэмэгдэж, нөөц багасахад хүргэж байна” гэж тайлбарлав. Энэ нь авто худалдааны салбарт сүүлийн жилүүдэд тохиолдсон хамгийн том өөрчлөлтүүдийн нэг гэж тэрээр тодорхойлжээ.

Шинэ автомашины борлуулалт жилийн өмнөхтэй харьцуулахад 22 хувиар, хуучин автомашины зах зээл 7 хувиар өсөөд байна. Гэвч энэ өсөлт удаан үргэлжлэхгүй байх эрсдэлтэйг шинжээчид анхааруулж буй. Учир нь үйлдвэрлэгчид болон дилерүүд татваргүй оруулсан автомашины нөөцөө дуусгасны дараа борлуулалт огцом унах магадлалтай гэж Telemetry компанийн судалгаанд дурджээ.

Telemetry-ийн тооцоолсноор, импортын татвар, үйлдвэрлэлийн өртөг өсөх нь АНУ болон Канад дахь автомашины борлуулалтыг жилд хоёр сая ширхэгээр бууруулах эрсдэлтэй байна. Зарим үйлдвэрлэгчид хэрэглэгчдэд дарамт учруулахгүйн тулд үнийг тогтоон барих оролдлого хийж байгаа ч эцэстээ зардлын өсөлтийг худалдан авагчдад шилжүүлэхээс өөр аргагүйд хүрч мэднэ.

Энэ нөхцөл байдалд Jaguar Land Rover зэрэг компаниуд импортын урсгалаа сааруулж, зарим автомашинаа боомт дээр хадгалж, бүрэн зогсоох шийдвэр гаргаад байна. Харин General Motors стратегийн хүрээнд АНУ дахь үйлдвэрүүдийн үйл ажиллагааг өргөтгөж, Индиана болон Теннесси муж дахь үйлдвэрүүдийг дахин ажиллуулж эхэлжээ.

Индиана мужид байрлах Rohrman Automotive Group-ийн гүйцэтгэх захирал Райан Роорман “дөрөвдүгээр сар тун хүчтэй эхэлсэн” гээд худалдан авалт, нөөцийн түвшин сайжирч байгаа нь бизнесийн сэргэлтэнд нөлөөлж буйг онцолсон байна. Тэдний компани нийт 22 франчайз эзэмшдэг ажээ.

Зарим автомашины компаниуд тарифын нөхцөл байдалд зохицуулан тусгай хөнгөлөлтийн хөтөлбөр зарлаж эхэлжээ. Ford болон Chrysler-ийн эзэмшигч Stellantis “ажилчдын үнээр” борлуулах арга хэмжээ хэрэгжүүлж байгаа бол Миссури мужийн Ford дилерийн менежер Ник Андерсон тарифын нөлөөгөөр үүссэн хямдралтай үнийг сонирхож буй худалдан авагчдын урсгалыг онцлон дурдсан байна. Гэвч тэрбээр ашиг буурч байгааг мөн хүлээн зөвшөөрсөн юм.

“Борлуулалт сайн байгаа ч хүмүүс үнийн хувьд маш мэдрэг болсон. Борлуулалтын тоогоор сайн ч ашгийн хувьд дарамттай байна” гэж Андерсон хэлжээ. Тэрбээр энэ жилийн борлуулалтаа өөдрөг байхаар харж байгаа ч тарифын нөхцөл байдал ирэх 60–90 хоногт хэрхэн өрнөх нь голчлон нөлөөлнө гэж анхааруулсан байна.

Ерөнхийлөгч Дональд Трамп зарим автомашины компанид дэмжлэг үзүүлэх талаар бодож буйгаа илэрхийлсэн ч яг ямар хэлбэрээр гэдгийг тодорхойлоогүй. Stellantis компанийн Төлөөлөн удирдах зөвлөлийн дарга Жон Элканн Трампын мэдэгдлийг эерэгээр хүлээн авч, 25 хувийн импортын тариф болон Европын зах зээл дэх хатуу стандартууд нь зах зээлийг эрсдэлд оруулж байгааг онцолжээ.