“OpenAI” компанийн хиймэл оюун ухааны хэрэгсэл болох ChatGPT-3.5, ChatGPT-4 зэрэг нь хүнтэй төстэй, торохгүй чөлөөтэй харилцан яриаг үүсгэх чадамжтай чатбот бөгөөд хэрэглэгчийн өгсөн даалгавар болон асуултыг өндөр түвшинд гүйцэтгэх чадвартай юм. Харин тус хэрэглүүрүүд улам ухаажиж, дэвшилтэт хөгжилд хүрч байгаа нь хүн эсвэл хиймэл оюуныг ялгаж, тодорхойлоход бэрхшээлтэй болж байгаа аж.

Сан Диегогийн Калифорнийн Их Сургуулийн Танин мэдэхүйн шинжлэх ухааны тэнхим орчин үеийн хиймэл оюун ухааны системүүд болох ELIZA, GPT-3.5, GPT-4-ийг хэрхэн ажиллаж байгааг судлах үүднээс Тюринг тестийн арга барилаар туршилт явуулсан байна. 

Судалгаанд оролцогчид хүн эсвэл хиймэл оюун ухаантай таван минутын турш харилцан яриа үүсгэж, дараа нь тэдний ярилцагч нь хүн мөн эсэхийг тодорхойлох ёстой байв.

Эрдэмтэд GPT-4 ба GPT-3.5 хэрэгсэлд “товч, нухацтай биш, үг үсгийн алдаа гаргаж, чөлөөт үг хэллэг ашигладаг залуу хүний дүрийг” өөртөө тусгах зааварчилгааг өгсөн байна. 

Тус судалгаанд хамрагдсан 500 оролцогчийг таван бүлэгт хуваарилсан бөгөөд оролцогчид зарим нь хүнтэй, зарим хэсэг нь хиймэл оюуны хэрэгсэлтэй харилцан яриа өрнүүлсэн юм. Таван минутын дараа оролцогчид ярилцагчаа хүн эсвэл хиймэл оюун ухаан гэдгийг тодорхойлж, шийдвэрийнхээ шалтгааныг тайлбарлав.

Судалгааны үр дүнд GPT-4 хэрэгсэлтэй харилцсан хүмүүсийн 54 хувь нь GPT-4-ийг хүн хэмээн тодорхойлсон бол GPT-3.5-ийг 50 хувь нь хүн хэмээн дүгнэсэн байна. Үүнээс улбаалан хиймэл оюун ухааны системүүд өөрийгөө хүн гэж итгүүлэх, хууран мэхлэх боломжтой болохыг харуулж буй юм.