Улсын Их Хурал дахь Монгол Ардын Намын бүлэг даваа гарагт ээлжит хуралдаанаа хийж, эдийн засаг, гадаад харилцаа, хууль тогтоомжтой холбоотой дөрвөн асуудлыг хэлэлцэн, тодорхой шийдвэрүүд гаргалаа.

Хуралдааны эхэнд Уул уурхайн бүтээгдэхүүний биржийн тухай хуульд нэмэлт, өөрчлөлт оруулах тухай хуулийн төслийг хэлэлцэв. Уг төслийг Засгийн газраас өргөн мэдүүлсэн ч, хууль зүйн үндэслэл болон практик хэрэгжилтэд тулгамдаж буй асуудлыг нарийвчлан судлах шаардлагатай гэж бүлэг үзэж, төслийг буцаан татахаар шийдвэрлэсэн байна. Энэ нь уул уурхайн бүтээгдэхүүний арилжааг ил тод, шударга, өрсөлдөөнтэй болгох зорилготой шинэчлэлийг илүү боловсронгуй болгох хэрэгтэйг харуулж байна.

Дараа нь Евразийн эдийн засгийн холбоо болон гишүүн орнуудтай байгуулах худалдааны түр хэлэлцээрийн төслийн танилцуулгыг Гадаад харилцааны яамнаас сонсож, уг асуудлыг холбогдох байнгын хороодоор хэлэлцүүлэх нь зүйтэй гэж үзэв. Түр хэлэлцээрийн хүрээнд Монгол Улс гаалийн хөнгөлөлт, тарифын уян хатан байдлыг сайжруулах боломжийг судалж байгаа юм.

Мөн Монгол Улсын Засгийн газар болон Оросын Холбооны Улсын Засгийн газар хооронд байгуулах, агаарын хөлгийн түлш нийлүүлэх хэлэлцээрийг авч хэлэлцлээ. Уг хэлэлцээрийг сайжруулах үүднээс бүлгийн гишүүдээс гаргасан саналуудыг нарийвчлан тусгаж, Гадаад харилцааны яам болон Аж үйлдвэр, эрдэс баялгийн яам цаашид хамтран ажиллах шаардлагатайг онцолсон байна. Энэхүү хэлэлцээр нь Монгол Улсын агаарын тээврийн хараат бус байдлыг хангах стратегийн ач холбогдолтой гэж үзжээ.

Хуралдааны төгсгөлд Төсвийн хууль тогтоомжийн уялдаа холбоог хангах ажлын хэсгийн ахлагч, УИХ-ын дэд дарга Х.Булгантуяа Төсвийн цаглабарын талаар хийсэн судалгаа, дүгнэлтээ танилцуулсан байна. Тэрбээр төсвийн боловсруулах, хэлэлцэх, батлах үе шатанд уялдаа сул байгааг онцолж, холбогдох хуулиудад нэмэлт, өөрчлөлт оруулснаар төсвийн оновчтой хуваарилалт хийх боломжтой болохыг дурджээ. Ийнхүү МАН-ын бүлгийн хуралдаан хэд хэдэн чухал асуудлыг хэлэлцэн, бодлого боловсруулах болон гадаад харилцааны түвшинд анхаарах зайлшгүй чиглэлүүдийг хэлэлцжээ.