АНУ-ын Трампын засаг захиргаа Харвардын их сургуулийг буруутган, тус сургуульд өгч байсан эрүүл мэндийн чиглэлийн 1 тэрбум ам.долларын нэмэлт санхүүжилтийг царцаахаар зэхэж буй тухай дотоод эх сурвалжууд мэдээлжээ. Энэ алхам нь хоёр талын дунд өрнөж буй гүнзгий маргаан, шинэ ажлын хэсгийн зүгээс тавьсан шаардлагад Харвардын Их сургууль татгалзсантай холбоотой юм.

Цагаан ордны дэргэд байгуулсан тусгай ажлын хэсэг Харвард болон АНУ-ын нэр хүндтэй элит сургуулиудад хандан хэд хэдэн хатуу шаардлага тавьсан байна. Тухайлбал, оюутны элсэлтийн журам, багш ажилчдын томилгоо, сургуулийн дотоод үзэл суртлын орчныг Холбооны Засгийн газар хянах эрхтэй болох тухай санал дэвшүүлжээ. Гэвч Харвард уг шаардлагуудыг Үндсэн хуулийн эрх чөлөөнд халдсан, шууд төрийн хяналт тогтоох оролдлого гэж үзэн хүлээн зөвшөөрөөгүй юм.

Дөрөвдүгээр сарын 11-нд Трампын захиргаанаас ирсэн албан бичгийг Харвард олон нийтэд ил болгосон нь Цагаан ордны дургүйцлийг улам гүнзгийрүүлжээ. Тус бичиг нь нууцад хамаарах баримт байсан хэмээн Цагаан ордны тал мэдэгдэж байгаа бол Харвардын Их сургууль ийм тохиролцоо байсныг үгүйсгэж байна.

Харвардын Ерөнхийлөгч Аллан Гарбер олон нийтэд хандан ил захидал бичихдээ, “Эдгээр шаардлага нь төрийн шууд зохицуулалтын шинжтэй байна” хэмээн онцолжээ. Түүний мэдэгдэл сургуулийн эрх баригчдын зүгээс Засгийн газрын шахалтыг олон нийтийн өмнө няцааж буй алхам гэдгийг илтгэж байна.

Тэрчлэн Харвардын Их сургууль олон улсын оюутны хөтөлбөр, татварын хөнгөлөлт, судалгааны санхүүжилтийн эрхээ алдах өндөр эрсдэлтэй тулгарч магадгүй болжээ. Одоогийн байдлаар нийт 2.26 тэрбум ам.долларын төсөл, хөтөлбөрийн санхүүжилт зогсоод байгаа тухай мэдээлэл ч гарсан байна.

Харвардын энэхүү хатуу байр суурь нь тус сургуулийг Трампын захиргааны бодлогын эсрэг бэлгэ тэмдэг болгон харах шалтгаан болж, АНУ-ын боловсролын байгууллагын эрх чөлөө, төрийн оролцооны хил хязгаарын тухай өргөн хүрээний хэлэлцүүлгийг өрнүүлэх магадлалтай болоод байна.