“Apple” компанийн хиймэл оюун ухааны шинэчлэлүүд аравдугаар сард хэрэглэгчдэд хүрэх бөгөөд iPhone болон iPad төхөөрөмжийн программ хангамжийн шинэчлэлтүүд хойшлогдох төлөвтэй байна.

Тус компани Apple Intelligence функцийн тогтвортой байдлыг дахин шалгах нь зүйтэй хэмээн үзэж илүү өргөн хүрээнд туршилт явуулж эхэлсэнтэй холбогдуулан нээлтийн хугацааг хойшлуулж, iOS программ хангамжаас салгаад буй. 

“Apple” хиймэл оюун ухааны нээлтийг энэ намар бета хувилбарт гаргана хэмээн мэдэгдэж байсан бөгөөд энэхүү шинэчлэл нь компанийн шинэ iPhone утасны борлуулалтыг нэмэгдүүлэх төлөвтэй байгаа аж.

Apple Intelligence функц нь зөвхөн iPhone 15 Pro болон түүнээс хойших загварууд дээр ажиллах юм. Түүнчлэн ChatGPT интеграцчлал, Siri-ийн шинэчлэл зэрэг функцийг оны сүүлээр гаргах төлөвтэй байна.

“Apple”-ийн зүгээс тус мэдээллийг тодруулах хүсэлтэд хариу өгөөгүй байна.