Сошиал медиа сүлжээний Instagram платформын хэрэглэгчид хиймэл оюун ухаанд суурилсан өөрсдийн гэсэн чатбот бүтээж, профайлдаа нэмэх боломжтой боллоо.

AI Studio гэх функц нь түгээмэл асуултад хариулах чадамжтай хиймэл оюунд суурилсан чатботыг үүсгэх боломжийг тус платформ дахь мэргэжлийн бүртгэлтэй контент бүтээгчдэд олгох аж. 

Хэрэглэгчид чатботны асуултын төрөл болон хориглох сэдэв зэрэг тохиргоог өөрсдөө хийх боломжтой хэмээн “Meta” компанийн зүгээс мэдэгдлээ.

“Meta” компани анх өнгөрсөн оны есдүгээр сард AI Studio шинэчлэлийг танилцуулсан юм. Түүнчлэн сүүлийн жилүүдэд тус компани хиймэл оюун ухаанд их хэмжээний хөрөнгө оруулалт хийж буйгаа дурдсан бөгөөд дэлхийн хамгийн шилдэг чатбот хөгжүүлэгч компани болж чадна гэдгээ “Meta”-ийн гүйцэтгэх захирал Марк Закерберг онцолсон байна.

“Meta” компани хамгийн сүүлийн үеийн том хэлний загвараа энэ сарын эхээр танилцуулсан ба энэхүү шинэ загвар нь математикийн нарийн төвөгтэй бодлогоос эхлүүлэн бүтэн номыг агшин зуурт шинжлэх чадамжтай аж.