Энэ оны зургадугаар сарын үзүүлэлтээр Европын цахилгаан автомашины зах зээлийн 11 хувийг БНХАУ-ын цахилгаан автомашин үйлдвэрлэгчид эзэлжээ. “SAIC Motor Corp” компанийн MG4 загварын автомашины нийлүүлэлт энэхүү үзүүлэлтийг тэргүүлсэн талаар судалгааны “Dataforce” компанийн хамгийн сүүлийн үеийн тайлан харуулжээ.

Хятадын цахилгаан автомашины Европын бүс нутаг дахь бүртгэл тус хугацаанд 23,000 хүрч, дээд түвшнийг тогтоосон байна. Европын Холбооноос Хятадын цахилгаан автомашинд ногдуулж буй импортын татвар хэрэгжиж эхэлсэнтэй холбогдуулан автомашин борлуулагчид яаравчлан бүртгүүлж эхэлсэн байна. Энэ оны долдугаар сарын 5-наас өмнө бүртгүүлсэн автомашиныг импортын цахилгаан автомашины татваргүйгээр худалдан авагчдад зарах боломжтой аж.

Хоёр тивийн автомашин үйлдвэрлэгчид шинэ импортын татвараас зайлсхийхийн тулд Европын цахилгаан автомашины үйлдвэрлэлийг нэмэгдүүлэхээр яарч байгаа бол Бээжин, Брюссель дэх эрх баригчдын хоорондох хурцадмал байдал худалдааны дайн болж хувирах эрсдэлтэй байгаа юм.

Зургадугаар сард бүртгэгдсэн MG4 автомашины 40 орчим хувь нь дилерүүд өөрсдөө бүртгүүлсэн нь "тийм ч эрүүл өсөлт биш" хэмээн “Dataforce”-ийн бүтээгдэхүүн хариуцсан дарга Габриэл Жухас дурдлаа.

Харин дэлхийн цахилгаан автомашины хамгийн том үйлдвэрлэгч BYD-ийн хувьд Герман улсад зохион байгуулагдсан хөлбөмбөгийн аварга шалгаруулах тэмцээний үеэр төвлөрсөн маркетингийн сурталчилгаа хийсэн нь хэрэглэгчдийн анхаарлыг ихээхэн татсан талаар “Dataforce”-ийн шинжээч Жулиан Литзингер онцоллоо.