Сангийн сайд Б.Жавхлан 2025 оны төсвийн төслийг танилцуулж, яагаад маш өндөр мөнгөн дүнтэй хөрөнгө оруулалтыг анх удаа дэд бүтцийн салбарт оруулах болсон шалтгаанаа тайлбарлалаа. “Хурдтай хөгжлийн төлөөх зориг” уриатай бүтээн байгуулалтын ажлуудыг эрчимжүүлэхийн тулд 2025 онд 600 гаруй төсөл хөтөлбөр хэрэгжүүлэхээр төлөвлөсний  14 нь мега төсөл байна.Тухайлбал,

1. Гашуунсухайт-Ганцмод, Ханги-Мандал, Шивээхүрэн-Сэхээ хилийн боомтуудын хил дамнасан холболтын төмөр зам

2. Хөшигийн хөндийн туннел

3. Тавантолгойн 450 мВт-ын хүчин чадалтай дулааны цахилгаан станц.

4. Эрдэнэбүрэнгийн 90 мВт-ын усан цахилгаан станц

5. Эгийн голын 310 мВт-ын усан цахилгаан станц

6.Газрын тос боловсруулах цогцолбор зэрэг томоохон бүтээн байгуулалтын  санхүүжилтийг үе шаттай шийдэхээр Монгол Улсын 2025 оны төсвийн төсөлд тусгасан байна.

Харин 2025 оны төсвийн төслийн бодлогын онцлогуудаас дурдвал:

1. Авто зам, эрчим хүч, дэд бүтцийн томоохон төслүүдийг санхүүжүүлнэ.

2. Нийслэлийн тулгамдсан асуудлыг шийдвэрлэнэ.

3. Эрчим хүчний хэмнэлттэй, байгаль орчинд ээлтэй ногоон орон сууцны хөтөлбөр хэрэгжүүлнэ.

4. Орон сууцжуулах хөтөлбөрийг Үндэсний баялгийн сантай уялдуулан цогцоор шийднэ.

5. Эрчим хүчний шилжилтийн зардлыг шийдвэрлэж, эрчим хүчний салбарын реформыг үргэлжлүүлнэ.

6. Бүсчилсэн хөгжлийн зорилттой уялдсан татварын бодлого хэрэгжүүлэн, боловсруулах үйлдвэрүүдийн татварыг хөнгөлнө гэлээ.Энэ бүх ажлыг гүйцэтгэхдээ төрийн оролцоог багасгаж, хувийн хэвшлийг дэмжихэд анхаарч ажиллана. Хөгжлийн хөрөнгө оруулалт, бүсийн томоохон дэд бүтцийн төслүүдийг санхүүжүүлэхэд нийт 6,9 их наяд төгрөгийг зарцуулахаар төсөвлөсөн нь хамгийн өндөр мөнгөн дүнтэй хөрөнгө оруулалтыг дэмжих жил болж байна.