Хэдий бэлтгэлтэй ч таныг дэлхийгээс хэдэн сая бээрийн алсад орших сансарт ердөө есхөн хоног ажиллуулна гэж илгээгээд есөн сар тэнд нь гацаачихвал яах вэ...

Яг ийм үйл явдал НАСА-ийн түүхэнд болж сансарт есөн сар гацсан нисэгчид өчигдөр эх дэлхийдээ эсэн мэнд газардлаа.

НАСА-гийн нисэгч Сунита "Суни" Уильямс, Барри "Бутч" Вилмор нар өнгөрсөн оны зургадугаар сард ойролцоогоор ес хоног үргэлжлэх туршилтын нислэгийн даалгавартайгаар дэлхийг орхисон. Гэвч "Боинг"-ийн "Starliner" сансрын хөлгийн их биеийн байгууламжтай холбоотой асуудал үүссэний улмаас тэдний Олон улсын сансрын станцад байх нь тодорхойгүй хугацаагаар сунасан. Олон улсын сансрын станц руу явах замд маш олон асуудал үүссэн тул НАСА эцэст нь "Starliner" хөлгийг хоосон буцааж, нисгэгчдийг "SpaceX"-д шилжүүлсэн. Шилжин суусан хөлөгт нь ч асуудал гарч тэндээ үлдэх шийдвэрийг газраас өгсөн юм.

Тэдний араас мөн өнгөрсөн оны есдүгээр сард "Crew-9" баг буюу Ник Хейг, Оросын "Роскосмос" агентлагийн нисгэгч Александр Горбунов нарыг нисгэсэн.  Гарсан гэмтлийг засварлах, нэмэлт туршилтыг үргэлжлүүлэн тэд хамтдаа зургаан сарыг туулсан. Дөрвөн сансрын нисгэгч "SpaceX"-ын "Dragon" сансрын хөлгөөр эх дэлхийдээ эргэн ирэв.

Есөн сар гацахдаа тэд дэлхийг 4576 удаа тойрч, 195 сая км зам туулжээ.

"Dragon" сансрын хөлөг Мексикийн буланд амжилттай буужээ.

Сансар судлалын түүхэнд ийм урт хугацаагаар төлөвлөгдөөгүй гацаж байгаагүй тул тэднийг эх дэлхийд нь буунгуут эрүүл мэндийн үзлэгт, мөн сансарт хэт олон хоног байхад хүний бие организмд ямар өөрчлөлт ордог талаар нарийн судлахаар эмнэлэг рүү авч явжээ. НАСА-ийн мэдээлснээр эх дэлхийн амьдралд дасахад багагүй хугацаа шаардлагатай гэнэ.

Энэ удаагийн нислэг нь олон орны хамтарсан багийнх гэдгээрээ онцлог. Дараагийн удаад ОХУ Илон Масктай ангараг гариг руу хийх нислэгт хамтрахаар төлөвлөж байна.