OpenAI компани 40 тэрбум ам.долларын санхүүжилт босгож, хувийн технологийн салбарын түүхэнд хамгийн өндөр дүнтэй хэлцэл хийлээ. Үүний үр дүнд компанийн үнэлгээ 300 тэрбум ам.долларт хүрч, дэлхийн хамгийн өндөр үнэлгээтэй хувийн компаниудын тоонд багтаж байна. Энэ нь SpaceX (350 тэрбум ам.доллар)-ийн дараа орох үзүүлэлт бөгөөд TikTok-ийн эзэмшигч ByteDance-тай ижил түвшинд хүрч буй юм.

Санхүүжилтийн дийлэнхийг буюу 30 тэрбум ам.долларыг Японы “SoftBank” компани гаргасан бол Microsoft, Coatue, Altimeter, Thrive зэрэг хөрөнгө оруулагчид мөн хамтарсан синдикат хөрөнгө оруулалт хийжээ. OpenAI энэ хөрөнгийг хиймэл оюуны судалгаа, тооцооллын дэд бүтцээ өргөжүүлэхэд ашиглана гэж мэдэгдсэн. Үүний 18 тэрбумыг SoftBank болон Oracle компанитай хамтран хэрэгжүүлж буй “Stargate” төсөлд зарцуулах аж.

Гэсэн хэдий ч хэрэв OpenAI 2025 оны эцэс гэхэд ашгийн төлөө байгууллага болж бүтцээ өөрчлөхгүй бол SoftBank хөрөнгө оруулалтаа 20 тэрбум ам.доллар болгон бууруулах магадлалтай. Энэ шилжилт нь Microsoft болон Калифорни мужийн ерөнхий прокуророос зөвшөөрөл авах шаардлагатай бөгөөд одоогоор Илон Маск уг асуудлаар шүүхэд гомдол гаргаад буй.

ChatGPT-ийн хэрэглэгчийн тоо эрчимтэй өсөж, долоо хоногт дунджаар 500 сая хүн идэвхтэй хэрэглэж буй. OpenAI-ийн орлого энэ жил 12.7 тэрбум ам.долларт хүрэх хүлээлттэй байна.