Хиймэл оюун хүний ​​бүтээлч байдлыг нэмэгдүүлж болох ч нөгөө талаар зарим бүтээлч ажлын байрыг орлох боломжтой талаар “OpenAI” компанийн технологи хариуцсан захирал Мира Мурати хуваалцжээ. Зургадугаар сарын 19-нд Дартмут коллежид болсон хэлэлцүүлгийн үеэр Мурати “OpenAI”-ийн ChatGPT гэх мэт хиймэл оюунд суурилсан хэрэгслийн салбаруудад үзүүлэх нөлөөллийн талаар ярилцжээ. Уг хэлэлцүүлгийн үеэр тэрбээр “Хиймэл оюун нь зохиол бичих, кино бүтээх зэрэг ажилд тусалж, бүтээлч байдлыг нэмэгдүүлэх боломжтой. Гэсэн хэдий ч хиймэл оюунаар бүтээсэн контент чанарын хувьд илүү байвал зарим бүтээлч ажлын байр алга болох эрсдэлтэй” хэмээн анхаарууллаа.

Хиймэл оюуныг хүмүүс оюун ухаан, бүтээлч чадварын цар хүрээг нэмэгдүүлэх хэрэгсэл талаас нь харах ёстой талаар Мурати онцолсон. Тэгвэл хиймэл оюун хүнтэй дүйхүйц ​​бүтээлч байж, ирээдүйд хүнийг бүрэн орлож чадах эсэх нь ээдрээтэй асуудал болоод буй.

Хиймэл оюун хүмүүсээс өөрөөр суралцдаг. Генератив хиймэл оюун өгөгдлийн зааврын дагуу зураг, текст, аудио зэрэг шинэ контент үүсгэхийн тулд алгоритм ашигладаг аж.

“Хүн төрөлхтөн хэрхэн мэдлэгээ нэмж, бүтээлч сэтгэлгээгээ хөгжүүлдэг талаар бид одоо ч бүрэн ойлголтгүй байна. Өөрсдөд маань үүнтэй холбогдох шинжлэх ухааны ойлголт байхгүй бол хиймэл оюуны системд суулгах боломжгүй” хэмээн “Lemurian Labs” компанийн технологи хариуцсан захирал Тео Омцигт өмнө нь хуваалцсан.

“McKinsey Global Institute” тайландаа 2030 он гэхэд АНУ-ын 12 сая орчим хөдөлмөр эрхлэгч хиймэл оюуны улмаас шинэ ажил олох шаардлагатай болж магадгүй талаар дурджээ.  Ялангуяа оффисын, харилцагчийн үйлчилгээ, үйлдвэрлэлийн салбарт хөдөлмөр эрхэлж буй хүмүүс үүнд хамгийн их өртөх магадлалтай аж.

Тэгвэл дуу, хөгжмийн салбарт хиймэл оюуны болзошгүй нөлөөний эсрэг хөдөлгөөн хэдийнэ өрнөжээ. Дөрөвдүгээр сард Билли Айлиш, Никки Минаж тэргүүтэй 200 гаруй уран бүтээлч хиймэл оюун уран бүтээлийг нь зөвшөөрөлгүй ашиглахаас хамгаалахыг шаардсан бичигт гарын үсэг зурсан.

Мира Мурати дата өгөгдлийн ашиглалттай холбоотой асуудлын тал дээр “OpenAI”  хэрэглэгчдээ дата мэдээлэл нь хэрхэн ашиглагдаж байгааг хянах боломжоор хангадаг төдийгүй өгөгдлөө хуваалцсанаар түүнээс ашиг олох арга хэрэгслүүдийг туршиж буйгаа мэдэгджээ.