БНХАУ-ын Гадаад хэргийн сайд Ван И гуравдугаар сарын 31-нээс дөрөвдүгээр сарын 2-ны хооронд Москва хотноо албан ёсны айлчлал хийж, ОХУ-ын Гадаад хэргийн сайд Сергей Лавровтой уулзаж байна. ОХУ-ын Гадаад хэргийн яамны мэдээлснээр, уулзалтын үеэр Орос-Украины дайныг зогсоох боломж, энхийн хэлэлцээний талаар хэлэлцэх магадлалтай гэж мэдэгдэв.

АНУ тэргүүлж буй өнөөгийн энхийн яриа хэлэлцээнд Бээжин илүү нөлөөтэй оролцох хүсэлтэй буй ч олон улсын шинжээчдийн үзэж буйгаар БНХАУ-ын гүйцэтгэх үүрэг хязгаарлагдмал байх төлөвтэй байна. Гэсэн хэдий ч Хятад улс энхийн төлөвлөгөөнд санхүүгийн дэмжлэг үзүүлэх, энхийг сахиулах хүч илгээх боломжийг үгүйсгэхгүй байгаа тухай эх сурвалжууд мэдээлж байна.

Энэхүү дипломат уулзалтуудтай зэрэгцэн Франц, Их Британи, Герман улсын зэвсэгт хүчний командлагч нар Украины нийслэл Киевт ойрын өдрүүдэд уулзалт хийхээр товлоод байна. Уулзалтын гол зорилго нь Украины батлан хамгаалах асуудал, мөн хамтарсан энхийг сахиулах хүч илгээх боломжийг хэлэлцэх юм. Их Британийн Ерөнхий сайд Кейр Стармер “Оросын талд үзүүлэх шахалтыг зөөлрүүлэх цаг огтхон ч биш” хэмээн мэдэгдээд буй.

Гэвч ийм төрлийн хэлцэлд Орос улс эрс эсэргүүцэл үзүүлж байгаа тул Европын орнуудын цэргийн оролцоо нь олон долоо хоногийн тохиролцоо шаардсан, маргаантай асуудал хэвээр байна. Олон улсын тайлбарлагчдын үзэж буйгаар энхийн хэлэлцээр амжилттай хэрэгжих эсэх нь гагцхүү АНУ, Европын холбоо зэрэг талуудын бүрэн оролцоо, улс төрийн эрмэлзэл, баттай тохиролцоонд хүрэх чадвараас ихээхэн шалтгаалахаар байна.