Монгол Улсын Засгийн газар 2025 оны 47 дугаар тогтоолоор “Атар-IV тариалангийн тогтвортой хөгжлийн аян”-ыг хэрэгжүүлэхээр баталж, Ерөнхий сайд Л.Оюун-Эрдэнэ энэ оны гуравдугаар сарын сүүлчээр Дархан-Уул аймагт болсон Хөдөө аж ахуйн зөвлөгөөн дээр албан ёсоор эхлүүллээ. Монгол орны эдийн засгийг уул уурхайгаас гадна хөдөө аж ахуй, аялал жуулчлалын тулгуур дээр тэгш хуваарилах шинэ бодлогын хүрээнд уг аян онцгой ач холбогдолтой юм.

“Атар-IV” нь ухаалаг технологи бүхий, экспортод чиглэсэн газар тариалан, эрчимжсэн мал аж ахуйг хослуулсан бүтээмж өндөр үйлдвэрлэл рүү чиглэнэ. Засгийн газрын тооцоогоор 2025-2029 оны хооронд 200 мянган га шинэ талбайг газар тариалангийн эргэлтэд оруулж, нийт 1.2 сая га-д хүргэхээр зорьжээ. Үүний зэрэгцээ усалгааны шинэ техник, хөрсөнд тохирсон сортоор үр үйлдвэрлэх, бүсчилсэн нийлүүлэлтийн сүлжээг сайжруулах ажлууд хийгдэнэ. Энэ бүхний үр дүнд хүнсний аюулгүй байдал хангагдаж, экспорт нэмэгдэнэ гэж Ерөнхий сайд мэдэгдлээ.

Түүх сөхвөл, Монгол Улс анхны Атрын аянаа 1959 онд зарлаж, тариаланг бие даасан салбар болгосон бол 1976 онд “Атрын II” аян тариалангийн талбайг эрс тэлж, хүнсний ногоо, гурилаар дотоодын хэрэгцээг хангадаг болсон. 2008-2010 онд хэрэгжсэн “Атрын III” аян тариалангийн эргэлтийн талбайг 270 мянгаас 760 мянган га-д хүргэж, улаанбуудай, төмсний хэрэгцээгээ дотооддоо бүрэн хангах боломжийг олгосон билээ.

Энэ удаагийн “Атар-IV” нь бүсчилсэн хөгжлийн бодлоготой уялдана. Төвийн бүсийг газар тариалан, хүнсний аж үйлдвэрийн тусгай дэд бүс болгон хөгжүүлэх зорилт тавьжээ. Хотоос хөдөөд шилжин суурьших залуу гэр бүлд дэмжлэг үзүүлж, газар эзэмших, орон сууцтай болох боломжийг хавсарч өгнө. Ингэснээр хөдөөгийн сэргэлт бодитоор урагшлах бөгөөд нийслэлийн хүн амын хэт төвлөрлийг сааруулах бодлогын нэг хэсэг болно.

Ерөнхий сайд зөвлөгөөний дараа хөдөө аж ахуйн техник, технологийн үзэсгэлэнг үзэж, хөрс боловсруулах, ургамал хамгаалах, ургац хураах техникүүд, бордоо, химийн бодисуудтай танилцсан юм. Түүнчлэн Хүнс, хөдөө аж ахуй, хөнгөн үйлдвэрийн яам Дархан-Уул аймаг руу бүрэн шилжин ажиллаж эхэлсэн талаар мэдээлж, тус яамны 200 албан хаагчтай уулзлаа.

Энэ бол төрийн байгууллага орон нутаг руу нүүх бодлогын анхны жишээ бөгөөд албан хаагчдад орон сууцны урьдчилгаа, ипотекийн зээлийн дэмжлэг олгож буй нь амьдрах нөхцөлийг сайжруулж байгааг ч тэд онцолжээ. Гэсэн ч давхар зээлийн асуудал, цахим системийн ачаалал зэрэгт анхаарахыг хүссэн байна.

Засгийн газрын энэ томоохон шинэчлэл, хөдөө орон нутагт чиглэсэн бодлогын үр дүнг ойрын жилүүдэд тариалангийн талбай, ургац, хүнсний хангалтаас гадна амьдралын чанарт хэрхэн нөлөөлөхийг харах үлдлээ. “Атар-IV” бол зөвхөн тариалангийн биш, харин хөдөө аж ахуйд суурилсан хөгжлийн цоо шинэ эхлэл болох хүлээлттэй байна.