Энэтхэгийн тэргүүн баячуудын нэг Мукеш Амбанигийн отгон хүү Анант Амбани болон түүний сүйт бүсгүй Радхика Мерчант нарын Мумбайд болсон хуримын өмнөх үдэшлэгт Жастин Бибер оролцжээ. Хосууд өнгөрсөн гуравдугаар сард мөн хурим угтсан тансаг үдэшлэг зохион байгуулсан бөгөөд Рианна, The Backstreet Boys, Кэти Перри, Андреа Бочелли тэргүүтэй одууд уран бүтээлээ хүргэж байсан юм.

Хуримын гол ёслолын арга хэмжээнд дуучин Адель тоглоно гэсэн цуу яриа гарч байгаа ч хуримлагч талуудын зүгээс үүн дээр албан ёсны мэдэгдэл хийгээгүй байна. Түүнчлэн ариун ёслолын арга хэмжээнд Амбанигийн гэр бүлийнхэн Болливудын хит дуун дээр бүжгийн үзүүлбэр үзүүлжээ. 

Гурван өдөр үргэлжлэх хүүгийнхээ хуримын зардалд 115 тэрбум ам.долларын хөрөнгөтэй Мукеш Амбани гар татаагүй бөгөөд Энэтхэгийн хамгийн тансаг, дээд зэрэглэлийн хурим болох төлөвтэй байна. 

Хуримын өмнөх эдгээр арга хэмжээ гала тоглолтоос өгсүүлээд загварын шоу болон хувирч байгаа бөгөөд зочдын өмсөж ирсэн шилдэг загвар зохион бүтээгчдийн хувцасууд олны анхаарлыг ихэд татжээ. Баян тансаг үдэшлэгүүдийн зардал тодорхойгүй байгаа ч Рианна 7 сая ам.доллар, Бибер ойролцоогоор 10 сая ам.долларын цалин авсан байна.  

Гурван өдөр үргэлжлэх хуримын ёслолын нарийн ширийн мэдээлэл одоог хүртэл нууцлагдмал хэвээр буй.