Gen Z буюу 1997–2012 оны хооронд төрөгсөд санхүүгийн ирээдүйдээ итгэх итгэлээ алдсан байдалтай байна. Credit Karma-ийн саяхны судалгаагаар энэ үеийн насанд хүрсэн гишүүдийн бараг тал нь буюу 49 хувь нь ирээдүйн төлөвлөлт “утгагүй” санагддаг хэмээн хариулжээ.

Эдийн засгийн хямрал, өрийн дарамт, ажиллах боломж хязгаарлагдмал байгаагаас болж олон Gen Z залуус санхүүгийн “цөхрөл”, “горьдлогогүй байдал”-д автсаныг Credit Karma-ийн Кортни Алев тайлбарласан байна. Залуус “Хуримтлуулах ямар хэрэг байна вэ?” гэсэн хандлагатай болж “YOLO” буюу “нэг л амьдарна” гэх сэтгэлгээгээр амьдарч буй нь анхаарал татаж байна.

Гэвч энэ хандлага хожмын томоохон эрсдэлд хүргэж болзошгүйг мэргэжилтнүүд анхааруулж байна. Санхүүгийн сахилга батгүй байдал нь өндөр хүүтэй өр хуримтлуулах, орон гэрээсээ хэт удаан гарах, тэтгэврийн төлөвлөлтөөс хожимдох зэрэг үр дагавар авчрах магадлалтай юм.

Санхүүчдийн үзэж буйгаар, залуу нас бол хуримтлал, хөрөнгө оруулалтын анхны алхмыг хийхэд хамгийн тохиромжтой үе байдаг. Хэдийгээр бага хэмжээний хадгаламж байсан ч урт хугацаанд нийлмэл хүүгийн хүчээр томоохон өсөлт авчрах боломжтой гэж онцолж байна. Алев “Хэрвээ залуу хүмүүс ирээдүйн төлөвлөлт хийлгүй, мөнгөө дураараа зарцуулсаар байвал урт хугацаанд хүнд үр дагавар дагуулна” хэмээн анхааруулжээ.

Gen Z үеийнхний урам хугарсан нь тодорхой шалтгаантай. Сүүлийн саруудад хөдөлмөрийн зах зээл шинэ төгсөгчид, ажил хайгчдын хувьд хүндхэн нөхцөлд байгаа юм. Ажил олголт удааширч, хөдөлмөрийн шилжилт хийх боломж мөн хязгаарлагдмал болжээ.

Ийм үед санхүүгийн зөв дадал төлөвшүүлэх нь хэзээ ч оройтохгүй алхам бөгөөд Gen Z үеийнхэнд зориулагдсан боловсрол, дижитал зөвлөмж, автомат хуримтлалын хэрэгсэл зэрэг бодит шийдлүүд чухал үүрэг гүйцэтгэх боломжтой байна.