Монгол Улсын гадаад валютын улсын нөөц нэгдүгээр улирлын эцэст 5 тэрбум ам.доллар давсан тухай Сангийн сайд Б.Жавхлан мэдэгдлээ. Монгол Улсын түүхэнд гурав дахь удаагаа 5 тэрбум ам.долларын түвшнийг давж байгаа юм.

Нүүрсний зах зээл уналттай байгаа ч алдагдлыг нь зэсийн баяжмалаар нөхөж байгааг Сангийн сайд яриандаа тэмдэглэв. Нэгдүгээр улирлын байдлаар зэсийн баяжмалын биет экспорт 40 хувиар нэмэгдэж, тэр хэрээр төсөвт төвлөрүүлэх орлого өссөн үзүүлэлттэй байна. Сангийн сайд Б.Жавхлан “ГВУН-ыг нэмэгдүүлэхэд хоёр чиглэлээр арга хэмжээ авч ашиглаж байгаа. Нэгдүгээрт, экспортын биет хэмжээг нэмэгдүүлэх, хоёрдугаарт, олон улсын санхүүгийн зах зээл дээрх нөөц боломжоо ашиглаж валютаа нэмэгдүүлэх бодлого хэрэгжүүлж байна. Цаашид ГВУН-ыг тогтвортой барих, нөөцөө хамгаалах, нэмэгдүүлэх чиглэлд бодлого төвлөрүүлж ажиллана” гэлээ.