Өнөөдрийн Засгийн газрын хуралдаанаар Үндэсний баялгийн сангийн тухай хуулийг хэрэгжүүлэх хүрээнд Аж үйлдвэр, эрдэс баялгийн яамнаас стратегийн 16 ордын хил хязгаарыг тогтоох асуудлыг Засгийн газрын хуралдаанд танилцуулжээ.

ЗГХЭГ-ын дарга Н.Учрал “Стратегийн 16 ордыг 39-өөр нэмэгдүүлж нийт 55 стратегийн ордыг УИХ-д өргөн мэдүүлэхээр Засгийн газар бэлдэж, ирэх долоо хоногт УИХ-ын тогтоолыг боловсруулж, Засгийн газар эцэслэнэ. Тавантолгойн бүлэг орд нь 16 стратегийн ордуудын нэгт тооцогддог. Монгол ард түмэн 55 ордоос Тавантолгойн ногдол ашиг шигээ ашиг хүртэж эхлэх юм бол ямар их хэмжээний үр ашиг хүртэлх нь ойлгомжтой. Ингэснээр Монголын ард түмэн стратегийн 55 орд дээр Тавантолгойн ногдол ашиг шиг ашиг хүртэх боломжтой болно” гэж мэдэгдлээ. ДНБ-ий таваас дээш хувийн бүтээгдэхүүн үйлдвэрлэдэг, улсын төсвөөр нөөц нь тогтоогдсон ордууд байгааг онцоллоо.

2024 онд Эрдэнэс Тавантолгой 3.9 их наяд төгрөгийн ашигтай ажиллажээ. Нэг иргэнд ХХОАТ-ыг хассан дүнгээр үлдэгдэл 93,500 төгрөг олгогдох төлөвлөгдөж байгааг Эрдэнэс Тавантолгой ХК-ийн удирдлагууд Засгийн газарт мэдээлжээ. Хоёрдугаар сард ногдол ашиг хуваарилах эсэх талаар санал асуулга явуулахад И-Монгол системд 505,000 орчим иргэн санал өгч, 481,000 орчим иргэн ногдол ашгаа бэлэн мөнгөөр авах санал өгчээ.