Нийгмийн сүлжээгээр дамжин Ghibli-стилийн хөрөг зургууд моод болон түгээд буй. Олон мянган хэрэглэгч өөрийн гэрэл зургийг домогт найруулагч Хаяао Миязакигийн бүтээлийг санагдуулам дүр төрхтэй болгон хувирган нийтэлж байна. Гэвч энэ хөнгөн хөгжилтэй тренд олон нийтийн анхаарлыг хувийн мэдээллийн нууцлалтай холбоотой зөрчил рүү чиглүүлж, мэргэжилтнүүдийн дунд маргаан үүсгэжээ.

Хүмүүс өөрсдийн зургийг сайн дураараа байршуулж байгаа нь OpenAI-д тэдгээрийг боловсруулж, хадгалах өргөн эрхийг олгож байна гэж зарим мэргэжилтнүүд анхааруулж эхлэв. Жишээлбэл, Европын Холбооны хувийн мэдээлэл хамгаалах журмын “хувь хүний хууль ёсны ашиг сонирхол”-ыг хангах шалгуурыг компаниуд тойрч гарах боломжийг олгож буй хэрэг юм.

Онлайн орчноос тухайн эзний зөвшөөрөлгүй шууд зурган мэдээллийг нь  татах нь хуульзүйн олон хязгаарлалтад ордог бол эсрэгээр хэрэглэгч өөрийн зургаа сайн дураар шууд байршуулснаар OpenAI-д өндөр чанартай, бодит дүр төрх бүхий зурган өгөгдлийг үнэгүй, бүрэн эрхтэйгээр ашиглах боломж нээгдэж байгаа гэсэн үг ажээ. Мөн энэ процессын явцад зөвхөн Ghibli стилийн хувилбар бус, анхдагч эх зураг ч OpenAI-ийн мэдээллийн санд хадгалагдан үлддэг нь судлаачдын үзэж буйгаар ирээдүйн хиймэл оюун ухааны сургалтад ашиглагдах бүрэн магадлалтай юм.

Ийнхүү хэрэглэгчид өөрсдийн зургийг хөгжилтэй байдлаар хувиргаж буй мэт харагдавч, үүний цаана хиймэл оюун ухааныг хөгжүүлэхэд ашиглагдах нэн үнэ цэнтэй өгөгдлийг өөрсдийн мэдэлгүйгээр бэлэглэж буй нь олон нийтийн хувийн мэдээллийн хамгаалалт, хэрэглэгчийн зүй ёсны өгөх зөвшөөрлийн талаарх асуудлыг дахин сөхөж байна.