Финтекүүдэд туслах инновацын оффисыг Монголбанкны дэргэд байгууллаа. Энэ инновацын оффисыг ажиллуулснаар финтек компаниудад эсвэл энэ чиглэлээр шинээр үйл ажиллагаа эрхлэх гэж байгаа албан байгуллага, хувь хүмүүст  одоогийн хуулийн зохицуулалт, зөвшөөрөл авах процесс, бүрдүүлэх материалтай холбоотой бүх мэдээллийг нэг дороос цаг алдалгүй авах боломж нөхцөлөөр хангах юм. Яаж зөвшөөрлөө авч, ямар хууль, журмын хүрээнд ажиллахыг нь тодорхой хэлж дэмжиж ажиллана. Мөн зах зээлд шинээр гарч ирэх санхүүгийн үйлчилгээ, шинэ технологийг цаг алдалгүй мэдээлэх, финтек компаниудтай уулзалт зохион байгуулж,санал туршлагаа солилцох орчноор хангах, цаашдын хөгжлийн чиг хандлагыг нь тодорхойлон, түүнд нийцсэн зохицуулалтын шинэчлэл, өөрчлөлтийг ч хийх боломжтой болж байна.

Монгол Улсад үйл ажиллагаа эрхэлж буй финтек компаниудад төвлөрсөн нэг цэгээс хууль эрх зүйн орчны зөвлөгөө өгөх, чиглүүлж хамтран ажиллах үүрэгтэй тогтолцоо өмнө нь байгаагүй. Тэгвэл тус инновацын оффистой болсноор финтекүүдийн үйл ажиллагаа нь зөвшөөрөлтэй эрхлэх гэсэн ангилалд хамаарах эсэх,хэрвээ манайд урьд өмнө эрхэлж байгаагүй үйлчилгээг шинээр нэвтрүүлэх гэж байгаа бол  зохицуулагч байгууллагын зүгээс хэрхэн бодлогын хариу арга хэмжээ авах гээд хууль эрх зүйн орчныг сайжруулахад финтекүүдтэй хамтран ажиллах юм байна.

Монголбанк болон СЗХ-ноос тавигдах шаардлага өндөр, зөвшөөрөл авахтай холбоотой хууль, журмын давхцал, тодорхой бус байдал, их хэмжээний бүрдүүлэх баримт бичиг, зөвшөөрөл авахтай холбоотой шимтгэл, хураамж гэх мэт олон бэрхшээлээс болж финтек компаниуд зөвшөөрөл авахдаа хойрго хандах байдал ажиглагддаг. Иймд эрэлтийг үндэслэн энэ төвийг байгуулах болсон гэдгээ Монголбанкны ерөнхийлөгч Б.Лхагвасүрэн инновацын оффисыг нээх үеэр танилцууллаа.