АНУ-ын Ерөнхийлөгч Дональд Трампын ойрын хүрээлэл дэх эх сурвалжуудын мэдээлснээр, Илон Маск тун удахгүй төрийн байгууллагын шинэчлэлийн хөтөлбөрөөс албан ёсоор гарахаар төлөвлөж байна. Маск нь “Government Efficiency” буюу Төрийн үр ашигт байдлыг нэмэгдүүлэх санаачлагыг удирдан, төрийн зардлыг бууруулах чиглэлд хүчтэй байр суурь илэрхийлж байсан. Гэвч Цагаан ордны зарим гишүүн болон Трампын холбоотнууд түүний урьдчилан таамаглах боломжгүй үйлдлүүдээс залхаж, улс төрийн эрсдэл хэмээн үзэх болсон нь энэхүү шийдвэрийн гол шалтгаан болжээ.

Вашигтоны улстөрийн гол мэдээллийн Politico сэтгүүл дэх эх сурвалжуудын мэдээлснээр цаг үеийн нөхцөл байдалд нийцүүлэн Ерөнхийлөгч Трамп, Маск хоёр энэхүү үүрэгт ажлыг дуусгавар болгох тохиролцоонд хүрсэн бөгөөд Маск ойрын хугацаанд зөвлөхийн статустайгаар Цагаан ордны орчинд үлдэж магадгүй гэж ахлах албан тушаалтнуудын нэг онцолсон байна.

Маскийн “түр хугацааны тусгай Засгийн газрын ажилтан” гэсэн эрх зүйн байр суурь ирэх тавдугаар сарын сүүлч, зургадугаар сарын эхээр хүчингүй болох төлөвтэй байгаа бөгөөд үүний дараа түүний оролцсон хэмнэлтийн реформын ажил төгсгөл болох хүлээлттэй байна. Уг статус нь ёс зүй болон ашиг сонирхлын зөрчлийн талаарх зарим журмаас чөлөөлөгдөх нөхцөлийг бүрдүүлдэг юм.

Засаг захиргааны зарим гишүүн Маскийг төрийн агентлагуудын бүтэц, зардлыг оновчтой танаж чадсан гэж үздэг бол бусад нь түүнийг зохион байгуулалт муутай, өөрийн “X” платформоор дамжуулан хэтрүүлэг бүхий санаачилга танилцуулж, Цагаан ордны үйл ажиллагаанд сөргөөр нөлөөлж буй гэж шүүмжилжээ. Тухайлбал, ажилтнуудаас ажлын бүтээмжийн тайлан шаардсан цахим захидал, халдварт өвчний хяналтын төсвийг санамсаргүйгээр танах гэх зэрэг үйлдэл нь олон нийтийн анхаарлыг татсан байна.

Мөн энэ долоо хоногийн эхэнд Ерөнхийлөгч Трамп Висконсин мужийн Дээд шүүхийн сонгуулийн үр дүнг хүлээн авсны дараахан “Илон Маск бол эх оронч, миний анд” хэмээн өргөмжилсөн ч улс төрийн хувьд дарамт үүсгэж буйг үгүйсгэсэнгүй. Хэвлэлийн бага хурлын үеэр тэрбээр “Илон Маск компанийнхаа ажилд анхаарал хандуулах хүсэлтэй байгаа. Харин би боломжоороо түүнийг удаан барихыг хүсэж байна” хэмээн онцолжээ.

Цагаан ордны хэвлэлийн төлөөлөгч Харрисон Филдс “Илон Маск Ерөнхийлөгч Трампын хөтөлбөрийг хэрэгжүүлэхэд чухал үүрэг гүйцэтгэсэн. Түүнд үзүүлэх дэмжлэг үргэлжилнэ” хэмээн мэдэгдсэн ч, Цагаан ордны орчинд түүний оролцоо аажмаар буурч буй нь илт харагдаж байна.