Монгол Улсын Ерөнхий сайдын захирамжаар байгуулагдсан экспорт нэмэгдүүлэх, саад бэрхшээлд хурдан хугацаанд хариу өгөх зорилготой ажлын хэсгийг Сангийн сайд Б.Жавхлан ахалж байгаа бөгөөд Сангийн сайдын хэлснээр уул уурхайн салбарт тулгараад буй асуудлыг цогц байдлаар шийдвэрлэж, гадаад валютын урсгалыг нэмэгдүүлэхэд гол анхаарлаа хандуулж байна.

Сайд Б.Жавхлангийн мэдээлснээр, 2025 оны эхний улиралд Монгол Улс нийт 17.4 сая тонн нүүрс, 1.8 сая тонн төмрийн хүдэр экспортолжээ. Энэ нь өнгөрсөн оны мөн үеийн түвшинтэй дүйцэж байгаа бол зэсийн баяжмалын экспорт 456 мянган тоннд хүрч, өмнөх оны мөн үеэс даруй 24 хувиар өссөн байна. Энэ өсөлт эдийн засгийн гадаад валютын урсгалд нааштай хандлага авчирч байгаа хэмээн Сангийн яамнаас дүгнэж байна.

Гэхдээ уул уурхайн бүтээгдэхүүн тээвэрлэх, гаалийн бүрдүүлэлт хийх, санхүүгийн гүйлгээг саадгүй болгох зэрэг олон асуудлыг зэрэг шийдэх шаардлага тулгарсаар буй. Тиймээс Ажлын хэсэг холбогдох төрийн байгууллагууд, хувийн хэвшлийнхэнтэй уялдаа холбоотой ажиллаж байгаа аж.

Түүнчлэн гадаад валютын улсын нөөцийг тогтвортой хадгалах асуудалд онцгой анхаарч эхэлжээ. Энэ хүрээнд Ажлын хэсэг банкны салбарын төлөөлөлтэй уулзалт хийж, цаашид хэрхэн хамтран ажиллах талаар санал солилцсон байна. Үүний үр дүнд Санхүүгийн тогтвортой байдлын зөвлөлийн хурлаар бодлогын түвшний асуудлыг хэлэлцэж, шаардлагатай зөвлөмжүүдийг гаргаж эхэлсэн байна.