Японы автомашин үйлдвэрлэгчид болох “Honda” болон “Nissan” компани дэлхийд борлуулалтаараа гурав дахь том автомашин үйлдвэрлэгч болох зорилготойгоор нэгдэх хэлцэл эхлүүлснээ албан ёсоор мэдэгдлээ. Энэхүү нэгдлийн зорилго нь нөөцөө нэгтгэн зардлаа бууруулж, цахилгаан автомашины зах зээлд өрсөлдөх чадвараа нэмэгдүүлэхэд чиглэх аж.

Хэлцлийн хүрээнд шинэ холдинг компани байгуулах бөгөөд тус компанийг Токиогийн Хөрөнгийн Биржид бүртгүүлэхээр төлөвлөж байгаа аж. Шинэ компанийн удирдлагыг “Honda”-гаас дэвшүүлэх бөгөөд компанийн стратегийн чиглэл, ирээдүйн хөгжлийг тодорхойлох үүрэгтэй байна хэмээв. Хоёр компани нэгдсэнээр жилд 191.4 тэрбум ам.долларын орлого, 20 тэрбум гаруй ам.долларын ашиг олох боломжтой гэж тооцоолж байна.

“Nissan”-ийн стратегийн түнш “Mitsubishi” компани энэхүү нэгдэлд багтах эсэх шийдвэрээ  2025 оны эхээр гаргах юм. Хэлцлийг 2025 оны дунд үе гэхэд дуусгах төлөвтэй байгаа бөгөөд бодит үр дүн нь 2030 оноос хойш мэдэгдэх магадлалтай гэж мэдээлжээ.

“Honda”-ийн гүйцэтгэх захирал Тошихиро Мибэ энэхүү алхам нь ирээдүйн өсөлт болон цахилгаан автомашины хөгжлийн хувьд зайлшгүй шаардлагатайг онцолжээ. Гэвч тэрбээр “Nissan”-ийн санхүүгийн байдал сайжрахгүй бол хэлцэл бүтэлгүйтэж болзошгүйг анхааруулсан байна.

Тэгвэл “Nissan”-ийн гүйцэтгэх захирал Макото Учида тус шийдвэрийг компанийн өрсөлдөх чадварыг хадгалахын тулд хийж буй алхам бөгөөд бууж өгч байгаа хэрэг биш гэдгийг тодотгожээ.

“Honda” болон “Nissan” компани энэхүү нэгдлийг “Tesla” болон Хятадын “BYD” зэрэг хүчтэй өрсөлдөгчийн эсрэг зогсох чухал арга хэмжээ гэж үзэж буй аж. Шинжээчид энэ алхам нь сул борлуулалт, хуучирсан бүтээгдэхүүний сонголт зэрэг олон сорилттой тулгарч буй “Nissan”-д онцгой дэмжлэг үзүүлэх боломжтой гэж дүгнэжээ.

Хэрэв “Honda” болон “Nissan” компанийн нэгдэл амжилттай хэрэгжвэл дэлхийд борлуулалтаараа “Hyundai”-г ардаа орхиж, “Toyota” болон “Volkswagen”-ийн дараа гуравдугаарт эрэмбэлэгдэх аж.